दक्षिण भारतीय अभिनेता विजय सेतुपतिको सन् २०२४ मा रिलिज फिल्म 'महाराजा' ले बक्स अफिसमा राम्रो कमाइ गरेको थियो।
यसले दर्शक तथा समीक्षकबाट प्रतिक्रिया पनि एकदमै राम्रो पाएको थियो। यतिबेला भने यो फिल्मको सिक्वेल बन्ने चर्चा चुलिएको छ।जसमा विजय सेतुपति फेरि मुख्य भूमिकामा देखिने अनुमान गरिएको छ।
हालै भारतीय मिडियासँगको कुराकानीमा विजयले यसबारे संकेत गरेका हुन्। उनले भनेका छन्, 'निर्देशक निथिलन समीनाथनले ‘महाराजा २’ को स्क्रिप्ट पूरा गरिसक्नुभएको छ। म चाँडै त्यो सुन्न उत्साहित छु।' उनको भनाइले 'महाराजा' को छिट्टै सिक्वेल बन्ने र त्यसमा विजय मुख्य भूमिकामा देखिने सम्भावनालाई बलियो बनाउँछ।
'महाराजा' मा विजयले एक साधारण तर बहादुर नाईको भूमिकामा अभिनय गरेका थिए, जसले आफ्नी छोरीको मृत्युको बदला लिन अनौठा तरिकाले योजना बनाउँछन्।
'महाराजा' लगानीको तुलनामा धेरै ठूलो मुनाफा कमाएको सिनेमा ठहरिएको थियो। २० करोड भारू बजेटमा बनेको फिल्मले विश्वव्यापी बक्स अफिसमा १ सय ९० करोड भारतीय रूपैयाँभन्दा बढी कमाइ गरेको थियो।
विजय हाल वेब सिरिज र अन्य फिल्महरूमा समेत सक्रिय छन्।
-1746009348.jpg)
