बलिउड सुपरस्टार शाहरूख खान फिल्म 'किङ' मार्फत दर्शकमाझ आउने तयारीमा छन्। निर्माण घोषणादेखि चर्चामा रहेको फिल्म आगामी डिसेम्बरमा प्रदर्शनमा आउने तय छ।
यो फिल्मको छायांकन सकिन लाग्दा शाहरूख अब आफ्नो अर्को फिल्मको योजना बनाउन केही लेखक र निर्देशकहरूसँग भेटघाट सुरू गरेका छन्। यस क्रममा शाहरूख र निर्देशक फराह खानले 'मैं हूँ ना २' को स्क्रिप्ट विकासमा काम गरिरहेको चर्चा छ। यसमा शाहरूख दोहोरो भूमिकामा देखिन सक्ने बताइएको छ।
यतिबेला शाहरूखको ध्यान ठूलो बजेट, पुरानो शैलीको परिपक्व रोमान्टिक ड्रामातर्फ पनि गएको छ। भारतीय संचारमाध्यम पिंकभिल्लाका अनुसार यस फिल्मको स्क्रिप्टले शाहरूखलाई निकै प्रभावित बनाएको छ। र, उनी यसलाई गम्भीरतापूर्वक विचार गरिरहेका छन्। फिल्मलाई शीर्ष स्तरको निर्देशकले निर्देशन गर्नेछन्, तर हाल यसको नाम भने गोप्य राखिएको छ।
शाहरूख फेरि प्रेमकथा शैलीका फिल्ममा फर्किन चाहन्छन्, जसले उनको सुपरस्टारको प्रारम्भिक छवि निर्माण गरेको थियो। स्रोतका अनुसार शाहरूख फराह खानको निर्देशनमा बन्ने फिल्म र नयाँ रोमान्टिक ड्रामा दुवै परियोजनाप्रति उत्साहित छन्।
यद्यपि, अन्तिम निर्णय जुन २०२६ सम्ममा हुने अपेक्षा गरिएको छ। जतिबेला उनी दुवै स्क्रिप्ट र तिनको विकास अवस्थालाई मूल्यांकन गर्नेछन्।
पछिल्ला वर्षहरूमा लगातार एक्सन फिल्महरू गर्ने क्रममा शाहरूखले केही चोटपटक समेत भोगेका थिए। चिकित्सकीय सल्लाह अनुसार उनी अब शारीरिक रूपमा एक्सन भूमिकाबाट केही समय टाढा रहन चाहन्छन्। यस कारणले उनी अब रोमान्टिक फिल्म गर्ने तयारीमा पुगेका छन्।
योजना अनुसार 'किङ' रिलिजपछि शाहरूख जनवरी वा फेब्रुअरी २०२७ बाट आफ्नो अर्को फिल्मको छायांकन सुरू गर्नेछन्।
-1746009348.jpg)
