बलिउड फिल्म 'धुरन्धर २' ले बक्स अफिसमा ठूलो सफलता हासिल गरेको छ।
रणवीर सिंह अभिनीत 'धुरन्धरः द रिभेन्ज'ले विश्वभर १५०० करोड भारूभन्दा बढी कमाइ गर्दै भारतीय फिल्महरूको उच्च कमाइ गर्ने सूचीमा चौथो स्थान बनाउन सफल भएको हो।
रिपोर्टअनुसार फिल्मले प्रदर्शनको छोटो अवधिमै यो उपलब्धि हासिल गरेको हो। दर्शकबाट प्राप्त सकारात्मक प्रतिक्रिया तथा बलियो प्रस्तुतिका कारण फिल्मले घरेलु तथा अन्तर्राष्ट्रिय दुवै बजारमा राम्रो कमाइ गर्न सफल भएको छ।
प्रस्तुतकर्ता जियो स्टुडिओका अनुसार भारतमा फिल्मको ग्रस बक्स अफिस कमाइ ११३४ करोड भारू पुगेको छ भने नेट कमाइ १००० करोड क्लब नजिक पुगेको छ। विदेशमा फिल्मले ३६७ करोड भारू कमाएसँगै विश्वव्यापी ग्रस कमाइ १५०१ करोड भारू पुगेको छ।
ग्रस कमाइ भनेको टिकट बिक्रीबाट भएको कुल आम्दानी हो भने नेट कलेक्सन भनेको करपछिको आम्दानी हो।
'धुरन्धर २' अब विश्वव्यापी बक्स अफिसमा १५०० करोड कमाउने चौथो भारतीय फिल्म बनेको छ। त्यस्तै यो 'दंगल' पछि यो उपलब्धि हासिल गर्ने दोस्रो बलिउड फिल्म हो।
अब विश्वव्यापी कमाइमा दंगल (२०७० करोड), बाहुबली २ (१७८८ करोड) र पुष्पा २ (१७४२ करोड) 'धुरन्धर २' भन्दा अगाडि छन्।
आदित्य धर निर्देशित 'धुरन्धर २' ले नेपालमा समेत १२ करोड नेरूभन्दा माथिको ग्रस कमाइ गरेको छ।
यो फिल्ममा रणवीरसहित आर माधवन, अर्जुन रामपाल, संजय दत्त, सारा अर्जुन र राकेश बेदीलगायत कलाकारहरूको अभिनय छ।
