विश्वव्यापी फिल्म डाटाबेस आइएमडीबीले सन् २०२६ को दोस्रो छ महिनाका सर्वाधिक प्रतीक्षित भारतीय फिल्महरूको सूची सार्वजनिक गरेको छ।
२५ करोडभन्दा बढी मासिक प्रयोगकर्ताको पेज भ्युका आधारमा तयार पारिएको सूचीमा अभिनेता रणवीर कपूर र आलिया भट्टका फिल्मले शीर्ष दुई स्थान ओगटेका छन्।
सूचीको पहिलो स्थानमा रणवीर कपूर अभिनीत 'रामायण' पार्ट १ रहेको छ। भगवान रामको वनवास, सीताको अपहरण र रावणविरूद्धको युद्धमा आधारित यो फिल्म दुई भागमा निर्माण हुँदैछ, जसको पहिलो भाग दिपावलीमा प्रदर्शन हुनेछ।
दोस्रो स्थानमा आलिया भट्ट अभिनीत स्पाइ थ्रिलर 'अल्फा' रहेको छ। यो यशराज फिल्म्सको स्पाइ युनिभर्स अन्तर्गतको पहिलो महिला-केन्द्रित स्पाइ फिल्म हो।
फिल्ममा आलियासहित शर्वरी, अनिल कपूरलगायत कलाकारहरूको अभिनय छ।
तेस्रो स्थानमा यशको 'टक्सिक' छ भने शाहरूख खानको बहुप्रतीक्षित 'किङ' चौथो स्थानमा सीमित भएको छ। सुपरस्टार शाहरूखको यो फिल्म बलिउडको सबभन्दा ठूला आगामी रिलिजहरूमध्ये एक भएपनि आइएमडीबी सूचीमा चौथो स्थानमा रहेको हो।
फिल्ममा शाहरूखकी छोरी सुहाना खानको पनि शीर्ष अभिनय रहेका कारण पनि ‘किङ’ थप चर्चा भइरहेको छ। यो फिल्म क्रिसमस २०२६ मा रिलिज हुनेछ। शीर्ष १० मा 'धमाल ४', 'दृश्यम ३', 'विश्वनाथ एन्ड सन्स', 'मिर्जापुरः द मुभी', 'हैवान' र 'ईथा' पनि परेका छन्।
आईएमडीबीका अनुसार सूचीमा हिन्दी, तमिल, मलयालम, तेलुगु र कन्नड भाषाका गरी २० फिल्म समावेश छन्, जसमा १२ हिन्दी, चार तमिल, दुई मलयालम तथा एक-एक तेलुगु र कन्नड फिल्म रहेका छन्।
