विश्वप्रसिद्ध गायक माइकल ज्याक्सनको जीवनमा आधारित फिल्म 'माइकल' ले विश्वव्यापी बक्स अफिसमा १ अर्ब अमेरिकी डलरभन्दा बढी कमाइ गर्दै इतिहास रचेको छ।
यससँगै फिल्मले अहिलेसम्मकै सर्वाधिक कमाइ गर्ने बायोपिकको कीर्तिमान कायम गरेको हो। फिल्मले यसअघि ९११ मिलियन डलर कमाएको 'बोहेमियन र्याप्सोडी' र ९७७ मिलियन डलर कमाएको 'ओपेनहाइमर' लाई पछि पार्दै नयाँ कीर्तिमान बनाएको हो।
एन्टोइन फुक्वाको निर्देशनमा बनेको यस फिल्ममा माइकल ज्याक्सनका भतिजा जाफर ज्याक्सनले मुख्य भूमिका निभाएका छन्। समीक्षकबाट मिश्रित प्रतिक्रिया पाए पनि दर्शकले फिल्मलाई अत्यधिक रूचाएका छन्।
'माइकल'ले प्रदर्शनको पहिलो सप्ताहन्तमै विश्वभर २१७ मिलियन डलर कमाउँदै संगीतप्रधान बायोपिकमध्ये सबभन्दा ठूलो ओपनिङ गर्ने कीर्तिमान पनि बनाएको थियो। बलियो 'वर्ड अफ माउथ'का कारण करिब तीन महिनासम्म निरन्तर दर्शक तान्दै फिल्मले १ अर्ब डलरको ऐतिहासिक उपलब्धि हासिल गरेको हो।
सन् २००९ जुन २५ मा ५० वर्षको उमेरमा माइकल ज्याक्सनको निधन भएको थियो। उनको निधन भएको करिब १७ वर्षपछि बनेको यो फिल्मले उनको सांगीतिक यात्रा, व्यक्तिगत जीवन र ज्याक्सन परिवारको संघर्षलाई पर्दामा उतार्दै 'किङ अफ पप'को विरासत नयाँ पुस्तासम्म पुर्याएको छ।
'माइकल' नेपालमा समेत रिलिज भएको थियो।
