बलिउड अभिनेता अजय देवगन अभिनीत कमेडी फिल्म 'धमाल ४'ले बक्स अफिसमा राम्रो कमाइ गरिरहेको छ। भारतमा चार दिनमा फिल्मले कुल ७३.३५ करोड भारू नेट कमाइ गरेको छ।
ट्रेड ट्रयाकर स्याकनिल्कका अनुसार फिल्मले प्रदर्शनको चौथो दिन सोमबार भारतमा अनुमानित ८.३५ करोड भारू नेट कमाएको छ। यससँगै भारतमा फिल्मको कमाइ ७३.३५ करोड रूपैयाँ पुगेको हो। ग्रस कमाइ भने ८७.८५ करोड भारू पुगेको जनाइएको छ।
प्रदर्शनको पहिलो सप्ताहन्तमा उत्कृष्ट कमाइ गरेपछि चौथो दिन भने बक्स अफिसमा केही गिरावट देखाएको भारतीय संचारमाध्यमले जनाएका छन्।
मिश्रित प्रतिक्रिया प्राप्त गरिरहेको यो फिल्मले घरेलु तथा अन्तर्राष्ट्रिय बजारमा सन्तोषजनक व्यापार जारी राखेको छ।
फिल्मले पहिलो दिन १४ करोड भारूबाट ओपनिङ गरेको थियो। दोस्रो दिन २२.५० करोड र तेस्रो दिन २८.५० करोड भारू कमाउँदै पहिलो सप्ताहन्तमा मात्रै नेट ६५ करोड भारूको व्यापार गर्न सफल भएको थियो। चौथो दिन कमाइमा केही गिरावट आए पनि समग्र व्यापारलाई सकारात्मक रूपमा हेरिएको छ।
विदेशी बजारमा पनि फिल्मले चौथो दिन १.५० करोड भारू थप्दै कुल १४.५० करोड भारू ग्रस कमाएको छ। यससँगै विश्वव्यापी ग्रस कमाइ १०२.३५ करोड भारू पुगेको छ।
इन्द्र कुमारको निर्देशनमा बनेको 'धमाल ४' सन् २०१९ मा प्रदर्शन भएको 'टोटल धमाल' को प्रत्यक्ष सिक्वेल हो। फिल्ममा अजय देवगन, रितेश देशमुख, अरशद वारसी, जावेद जाफरी, रवि किशनलगायत कलाकारहरूको अभिनय छ।
फिल्मले मिश्रित समीक्षा पाए पनि बक्स अफिसमा भने राम्रो सुरुआत गरेको छ। केही दर्शकले फिल्मलाई मनोरञ्जनात्मक कमेडी भनेका छन् भने केहीले कथा, लेखन तथा एआईबाट तयार गरिएका दृश्यहरूको प्रयोगप्रति असन्तुष्टि जनाएका छन्।
'धमाल ४' नेपालका सिनेमा हलहरूमा समेत प्रदर्शन भइरहेको छ।
