दक्षिण भारतीय स्टार यश अभिनीत फिल्म 'टक्सिक: अ फेयरी टेल फर ग्रोन-अप्स'को कमाइमा पहिलो सोमबार ठूलो गिरावट आएको छ।
सुरूआती दिनमा आक्रामक व्यापार गरेको फिल्मले सोमबार भने ७ करोड भारूमा चित्त बुझाउनुपरेको हो।
व्यापारसम्बन्धी वेबसाइट सैकनिल्कका अनुसार फिल्मले सोमबार भारतमा ७.४५ करोड भारू नेट कमाएको छ। सोमबार फिल्मका १३ हजार ४०० शो चलेका थिए भने औसत अकुपेन्सी १७.१ प्रतिशत थियो। पहिलो दिनको तुलनामा सोमबारको कमाइ ६७.६ प्रतिशतले घटेको हो। यो फिल्मको अहिलेसम्मकै सबभन्दा कम एकदिने कमाइ हो।
'टक्सिक'ले पहिलो दिन भारतमा १०१ करोड भारू नेट कमाउँदै कन्नड सिनेमामा दोस्रो ठूलो ओपनिङ गरेको थियो। तर, त्यसपछि भने फिल्मको दैनिक कमाइ लगातार ओरालो लागेको छ। फिल्मले दोस्रो दिन ३७.६५ करोड, शनिबार २५.१५ करोड र आइतबार २३ करोड भारू कमाएको थियो।
सोमबारको कमाइ जोडिएसँगै फिल्मको भारतमा कुल नेट कलेक्सन २२१.५५ करोड भारू पुगेको छ।
यद्यपि २०० करोडको आँकडा पार गरे पनि दैनिक कमाइमा देखिएको गिरावटले फिल्मको व्यापारलाई लिएर चिन्ता बढाएको छ।
यशको अघिल्लो ब्लकबस्टर फिल्म ‘केजीएफ च्याप्टर २’सँग तुलना गर्दा 'टक्सिक' निकै पछाडि छ। 'केजीएफ च्याप्टर २'ले रिलिजको पहिलो पाँच दिनमै भारतमा ४३०.१५ करोड भारू नेट कमाएको थियो।
गीतु मोहनदासको निर्देशनमा बनेको 'टक्सिक'मा यशसँगै नयनतारा, कियारा आडवाणी, हुमा कुरेसी, रूक्मिणी वसन्त र तारा सुतारियालगायत कलाकारको अभिनय छ। फिल्मले प्रदर्शनअघि नै ठूलो चर्चा पाए पनि रिलिजपछि भने यसको कथा, पटकथा र हिंसात्मक दृश्यलाई लिएर दर्शकबाट मिश्रित तथा नकारात्मक प्रतिक्रिया पाएको छ।
'टक्सिक' नेपालमा पनि एकसाथ प्रदर्शनमा आएको थियो। अहिले देशभरका हलमा फिल्म प्रदर्शनरत छ।
