अभिनेता टाइगर श्रफ सवार गाडीमा गोली प्रहार भएपछि बलिउडमा कलाकारको सुरक्षालाई लिएर चिन्ता बढेको छ।
घटनापछि मुम्बई प्रहरीले अन्य कलाकारको सुरक्षामा निगरानी बढाएको छ भने फिल्मकर्मीका संस्थाहरूले पनि कलाकारको सुरक्षा सुनिश्चित गर्न माग गरेका छन्।
'यदि अन्डरवर्ल्डले टाइगरलाई निशाना बनाउन सक्छ भने हामीमध्ये जोकोही अर्को निशाना बन्न सक्छौं,' टाइगरसँग काम गरिसकेका एक वरिष्ठ बलिउड कलाकारलाई उद्धृत गर्दै हिन्दुस्तान टाइम्सले लेखेको छ।
अभिनेता सुनिल शेट्टीले पनि घटनाप्रति चिन्ता व्यक्त गरेका छन्।
'टाइगरजस्ता चर्चित कलाकारमाथि यस्तो घटना हुन सक्ने हो भने जो कोहीमाथि पनि हुन सक्छ,' द इन्डियन एक्सप्रेसले उनका भनाइ उद्धृत गर्दै लेखेको छ।
आइतबार साँझ मुम्बईको जुहु क्षेत्रमा फुटबल खेलेर घर फर्किने क्रममा टाइगर सवार बिएमडब्लू गाडीमा गोली प्रहार भएको थियो। टाइगर सकुशल रहे पनि उनका चालक र अर्का एक जनासहित दुई जना घाइते भएको भारतीय सञ्चारमाध्यमले जनाएका छन्।
द इन्डियन एक्सप्रेसका अनुसार अहिले प्रहरीले अभिनेता सलमान खान र फिल्म निर्देशक रोहित शेट्टीको निवासबाहिर अतिरिक्त प्रहरी परिचालन गरेको छ। अभिनेता आमिर खानको निवास आसपास पनि गस्ती बढाइएको छ।
यसैबीच, फेडेरेसन अफ वेस्टर्न इन्डिया सिने एम्प्लोइज (एफडब्लुआइसिई) ले घटनाको निन्दा गर्दै टाइगर र उनको परिवारका लागि थप सुरक्षा माग गरेको छ।
संस्थाले फिल्म उद्योगसँग सम्बन्धित व्यक्तिहरूको सुरक्षा र संरक्षणबारे चिन्ता व्यक्त गरेको हिन्दुस्तान टाइम्सले जनाएको छ।
घटनापछि सामाजिक सञ्जालमा लरेन्स विश्नोई समूहसँग सम्बन्धित व्यक्तिहरूले आक्रमणको जिम्मेवारी लिएको दाबीसमेत सार्वजनिक भएको छ।
गोली प्रहारपछि विदेशमा रहेका भनिएका अनिल पण्डितले घटनाको जिम्मेवारी लिएको दाबी गर्दै अडिओ सन्देश सार्वजनिक भएको रिपोर्टहरू आएका छन्। उक्त सन्देशमा अभिनेता सलमान खानलाई लरेन्स विश्नोई र विश्नोई समुदायसँग माफी माग्न भनिएको पनि समाचारमा उल्लेख छ।
तर प्रहरीले उक्त समूहकै संलग्नता रहेको पुष्टि गरिसकेको छैन।
प्रहरीले आक्रमणको उद्देश्य रकम असुली हुन सक्ने आशंका गरेको छ। एक प्रहरी अधिकारीका अनुसार आक्रमणकारीहरूले डर सिर्जना गरेर रकम असुल्न खोजेको बताएका छन्।
घटनामा संलग्न भएको आरोपमा प्रहरीले तीन जनालाई राजस्थानको कोटा नजिक रेलबाट पक्राउ गरेको छ। उनीहरू सोमबार बिहान पुणे–जयपुर सुपरफास्ट एक्सप्रेसबाट पक्राउ परेका हुन्। मुम्बई प्रहरीले दिएको सूचनाका आधारमा राजस्थान प्रहरीले रेलमा खोजी गरेको थियो।
प्रहरीका अनुसार पक्राउ परेकामध्ये एक जनाले गोली प्रहारमा प्रयोग भएको मोटरसाइकल चलाएका थिए। अन्य दुई जनाले टाइगरको गाडीमा गोली चलाएको आरोप छ।
उनीहरूलाई मुम्बई ल्याएर अनुसन्धान अघि बढाइएको छ। प्रहरीले घटनाको अनुसन्धान मुम्बई अपराध शाखाको जबर्जस्ती असुली नियन्त्रण शाखालाई सुम्पिएको पनि द इन्डियन एक्सप्रेसले जनाएको छ।
विपक्षी नेताहरूले भने महाराष्ट्रको कानुन व्यवस्थामाथि प्रश्न उठाएका छन्।
कंग्रेस नेता सचिन सावन्तले टाइगरको गाडीमा गोली प्रहार भएको घटनासहित मुम्बईमा भएका अन्य हिंसात्मक घटना उल्लेख गर्दै राज्यको सुरक्षा व्यवस्थामाथि आलोचना गरेका थिए।
टाइगरमाथिको आक्रमणपछि कलाकारका घरमा सुरक्षा बढाइनु, फिल्मकर्मीका संस्थाले सुरक्षा माग गर्नु र कलाकारहरूले सार्वजनिक रूपमा चिन्ता व्यक्त गर्नुले बलिउडमा सुरक्षाको विषय पुनः बहसमा आएको छ।
प्रहरीले घटनामा संलग्न व्यक्तिमाथि अनुसन्धान जारी राखेको भारतीय सञ्चार माध्यमहरूले जनाएका छन्।
