नेपाल धितोपत्र बोर्डले राफसाफ कोषलाई मजबुत र प्रभावकारी बनाउन नेप्सेलाई निर्देशन दिएको छ।
स्थापना भएको राफसाफ कोषमा हालसम्म नगन्य रकम जम्मा भएको छ। राफसाफ सुनिश्चितता हुनेगरी कोष कार्यान्वयनमा आउन नसक्दा समयमा नै लगानीकर्तालाई धितोपत्र बिक्री वापतको रकम भुक्तानी हुन सकेको छैन।
धितोपत्रको दोस्रो बजारमा कारोवार रकम दिनानुदिन बृद्धि भइरहेको अवस्थामा निहीत प्रणालीगत जोखिमलाई न्यूनीकरण गर्न आवश्यक भएको जनाउँदै बोर्डले कारोबारको समयमा नै राफसाफ गराई बजारलाई व्यवस्थित र अनुशासित राख्न विद्यमान राफसाफ कोषलाई कार्यान्वयन योग्य बनाउन आवश्यक देखिएको स्पष्ट पारेको छ।
कोषलाई कार्यान्वयन योग्य बनाउन आवश्यक रकम जम्मा हुने व्यवस्था अबिलम्व गर्नुपर्ने जनाउँदै बोर्डले सम्बद्ध पक्षलाई योगदान गर्न निर्देशन दिएको छ।
कोषमा धितोपत्र बजार, धितोपत्रको राफसाफ सेवा प्रदान गर्ने संस्था र समान रुपमा सम्पूर्ण राफसाफ सदस्यहरु (धितोपत्र दलालहरु) को योगदान हुनुपर्ने बोर्डले जनाएको छ।
आर्थिक वर्ष २०७७।७८ भित्र ५० करोड, आर्थिक वर्ष २०७८।७९ भित्र थप ३० करोड र आर्थिक वर्ष २०७९।८० भित्र थप २० करोड गरी कुल १ अर्व रकमको कार्यान्वयन योग्य कोष स्थापना र संचालन हुनेगरी कार्य गर्न नेप्सेलाई भनिएको छ।
राफसाफ कोषमा धितोपत्र बजारले समग्रमा कोषको ५० प्रतिशत रकम, राफसाफ सेवा प्रदान गर्ने संस्थाले समग्रमा कोषको ३० प्रतिशत र राफसाफ सदस्यहरु (धितोपत्र दलालहरु) ले समग्रमा कोषको २० प्रतिशत रकम जम्मा गर्नुपर्नेछ।
उक्त रकमको अतिरिक्त कोषलाई जोखिममा आधारित हुने गरी सुदृढ बनाउन धितोपत्र बजार (कोष व्यवस्थापक) ले धितोपत्र दलालहरुको पछिल्लो महिनाको औसत दैनिक कारोबार रकमको १ प्रतिशत रकम चालु महिनाको १५ गतेभित्र थप गर्न लगाई गतिशील योगदानको रुपमा कोषमा जम्मा गर्नुपर्नेछ।
उपर्युक्त बमोजिम थप रकम निर्धारण गर्दा मासिक रुपमा पुनरावलोकन गर्ने र यसरी थप गर्ने रकम पछिल्लो महिनाको गतिशील योगदान भन्दा धेरै भएमा फरक रकम मात्र राफसाफ कोषमा धितोपत्र दलालले थप योगदान गर्नुपर्ने छ।
राफसाफ कोषको व्यवस्थापन सम्बन्धमा अन्तर्राष्ट्रिय प्रचलन अनुरुप हुने गरी धितोपत्र बजारले कोषको संचालक समितिको रुपमा र राफसाफ सेवा प्रदान गर्ने संस्थाले कोष व्यवस्थापकको रुपमा कार्य गर्नुपर्नेछ।