कृष्ण मन्दिरमा राष्ट्रपति, भूकम्पपछि पहिलो पटक मन्दिर खुला

नारायण महर्जन

काठमाडौं, भदौ १७

राष्ट्रपति विद्यादेवी भण्डारीले श्रीकृष्ण जन्माष्टमीका अवसरमा आज पाटनस्थित कृष्ण मन्दिर गई भगवान् श्रीकृष्णको पूजा एवं दर्शन गरेकी छन्।

प्रत्येक वर्ष भाद्र कृष्णाष्टमी अर्थात् आजका दिन राष्ट्राध्यक्षले पाटन कृष्ण मन्दिरमा पूजा एवं दर्शन गर्ने परम्परा रहिआएको छ। सो अवसरमा राष्ट्रपति भण्डारीले मन्दिरका पुजारीबाट फूल एवम् प्रसाद ग्रहण गरिन्। सत्रौँ शताब्दीमा राजा सिद्धिनरसिंह मल्लका पालामा निर्माण भएको उक्त मन्दिर गोरखा भूकम्पबाट आंशिक क्षति पुगेकामा हालै मर्मतसम्भार गरिएको हो।

मन्दिरको जीर्णोद्धार रु ५७ लाखको लागतमा काठमाडौं उपत्यका संरक्षण कोषले गरेको हो। किंवदन्तीअनुसार महादेव मन्दिर बनाउन राखिएको जग्गामा सपनामा भगवान् कृष्णले मन्दिर बनाउन भनेपछि राजा सिद्धिनरसिंहले खन्न लगाउँदा जमीनमुनि कृष्णको मन्दिर फेला परेको थियो।

त्यसपछि तल कृष्ण र माथि शिव मन्दिर स्थापना गरिएको पुजारी विष्णुधर राजोपाध्यायले जानकारी दिइन्।

राष्ट्रपति विद्यादेवी भण्डारीलाई ललितपुर महानगरपालिकाका मेयर र उपमेयरले स्वागत गरेका थिए।

पाटनको मङ्गलबजारस्थित प्रसिद्ध कृष्णमन्दिरमा आज बिहानैदेखि भक्तजनको भीड लागेको छ।