बुटवलमा निर्माण सम्पन्न हुन लागेको कालिकापथ सडकमा रहेका विद्युतीय पोल हटाएर नयाँ मोडलका मोनोपोल राख्न थालिएको छ।
बस्तीको बीचबाट १३२ केभिए प्रशारण लाइन लैजाँदा बस्ती नै असुरक्षित भएको भन्दै त्यसलाई हटाएर मोनोपोल राख्न थालिएको हो।
कालिकापथको योगिकुटी चोकदेखि होराइजन चोकसम्म सडकखण्डको मध्यभागमा रहेका ४ वटा विद्युतका ठूला पोलहरूको बेसमेन्ट बढी फराकिलो हुँदा दुर्घटनाको जोखिम बढेको थियो।
अहिले प्रशारण लाइनका पोलले सडकको धेरै भाग ओगटेको, देख्दा भद्दा र बेला-बेला दुर्घटनाको समेत जोखिम बढेपछि रूपन्देही क्षेत्र नंं २ का सांसद एवं पूर्व उपप्रधान तथा अर्थमन्त्री विष्णु पौडेलले गत निर्वाचनका बेला एकखुट्टे टावर (मोनोपोल) राख्ने प्रतिबद्धता जनाएका थिए।
सडकका बीचमा अहिले रहेका विद्युतका भद्दा पोलहरू हटाएर मोनोपोल राखिएपछि कालिकापथ आकर्षक हुनुको साथै सडक र बस्ती सुरक्षित हुने पौडेलले बताए।
विद्युत प्राधिकरण बुटवल ग्रिडका इन्जिनियर सूर्य पाण्डेले मोनोपोल निर्माणका लागि विद्युत प्राधिकरणले काठमाडौंको युनाइटेड ब्रदर्शलाई ठेक्का दिएको जानकारी दिए।
करिब ४ करोडको लागतमा कालिकापथमा रहेका ४ वटा पुरानो पोलहरू हटाइ नयाँ पोलहरू निर्माण गरी विद्युत तारहरू सिफ्ट गरिने पाण्डेले बताए। पाण्डेले यी मोनोपोल नेपालको लागि नयाँ भएको बताए।
आइतबारदेखि माटो परीक्षणको काम सुरू गरिएको र अब निरन्तर काम अगाडि बढाइ फागुन महिनाभित्रै ४ वटै पोल सिफ्ट हुने पाण्डेले दावी गरे। इन्जिनियर पाण्डेका अनुसार अहिले रहेका विद्युत पोलबाट सडकमा गुड्ने सवारी साधनहरू छुन सक्ने समेत खतरा रहेकोले मोनोपोल निर्माणपछि जमिनबाट तारको दुरी बढाइने छ।
अहिले जमिनबाट तारको दुरी ५ दशमलव ५ मिटर मात्रै रहेकोमा ३२ मिटर अग्ला मोनोपोल जडान गरेपछि जमिन र तार बिचको दुरी नै ९ मिटर हुनेछ। जसले सवारी साधनको माथिल्लो भाग अग्लो भएपनि तारसँग छुने सम्भावना न्यून हुने छ। विद्युत प्राधिकरणका अनुसार मोनोपोल नेपालमा निर्माण नहुने भएकोले भारतको राजस्थानबाट ल्याउनु पर्ने हुन्छ।
