काठमाडौं थापागाउँस्थित एक थिएटरमा मञ्चन भइरहेको नाटक ‘लुसिफर राइजिङ’ को मञ्चन रोकिएको छ। निर्माण पक्षले राजनीतिक दबाबको कारण देखाउँदै नाटकको मञ्चन रोकिएको सूचना सार्वजनिक गरेको छ।
सूचनामा भनिएको छ- 'अज्ञात राजनीतिक व्यक्ति, प्रवृत्ति र समूहको दबाबका कारण ‘लुसिफर राइजिङ’ को शो रोक्न बाध्य भएका हौं।'
मझुवा बगरको प्रस्तुति, सहलेशको लेखन तथा निर्देशन रहेको नाटक जेठ १ गतेदेखि मञ्चन भइरहेको थियो। नाटक जेठ २० सम्म मञ्चन हुने तालिका थियो।
राजनीतिक दबाबको कारण देखाउँदै नाटक मञ्चन रोकिएपछि यसबारे राष्ट्रिय स्वतन्त्र पार्टी (रास्वपा) सांसद गणेश कार्कीले चासो देखाएका छन्।
उनले सामाजिक सञ्जालमा पोस्ट लेख्दै 'नाटक राजनीतिक कारण र सुरक्षाsf नाममा बन्द गराइएको विषयप्रति आफ्नो चासो रहेको' बताएका छन्।
उनले सरकार र पार्टीसँग बुझ्दा उक्त नाटक मञ्चन हुन नदिने कुनै सोच नभएको जानकारी पाएको उल्लेख गरेका छन्। उनले लेखेका छन्, 'कसले धम्की दिएको भन्नेबारे बुझ्न खोज्दा सो नाटकका निर्देशकसँग सम्पर्क हुन सकेको छैन। थप बुझ्ने क्रममा छु।'
कार्कीले निर्वाध कलाकारिता र स्वतन्त्र पत्रकारितालाई लोकतन्त्रका अभिन्न अंगका रूपमा व्याख्या गर्दै यस्ता विषयमा सीमा लगाउने सोच वर्तमान सरकारको नरहेको दाबी गरेका छन्।
कार्कीले हालै सेन्सर बोर्डमा भएको परिवर्तनलाई उदाहरण दिँदै अब फिल्ममा 'यो दृश्य काट' वा 'त्यो परिवर्तन गर' भन्ने अभ्यास हटाइएको र कुन उमेर समूहका दर्शकले हेर्न मिल्ने वा नमिल्ने भन्ने वर्गीकरण मात्र गरिने व्यवस्था लागू भएको बताएका छन्।
कार्कीले अगाडि लेखेका छन्, 'त्यसैले सो नाटकका निर्देशकलाई सम्पर्कमा आउन तथा धम्की दिने जो कोही भएपनि जानकारी दिएर अनुसन्धानमा सहयोग गर्न आग्रह गर्दछु।'
