धादिङको त्रिशुली नदीमा एक पुरूषको शव फेला परेको छ।
मंगलबार बिहान साढे ८ बजे गजुरी गाउँपालिका-२ छहरास्थित त्रिशुली नदीमा एक पुरूषको शव फेला परेको जिल्ला प्रहरी कार्यालय धादिङका डिएसपी सन्तु जैसवालले जानकारी दिए।
मृतक भक्तपुरको दुवाकोट बस्ने अन्दाजी २३/२४ वर्षीय रोमसिंह ठकुरी छन्।
उनी गत शनिबार बिहान साढे ११ बजे गजुरी गाउँपालिका-५ घाटबेसीस्थित नदीमा पौडी खेल्नेक्रममा बेपत्ता भएका थिए। बेपत्ता भएका उनको खोजी गर्नेक्रममा ४ किलोमिटर तल शव फेला परेको डिएसपी जैसवालले बताए।
उनका अनुसार ठकुरी साथीहरूसँग घुम्न त्रिशुली पुगेका थिए। त्यसक्रममा उनलाई नदीले बगाउँदा बेपत्ता भएका हुन्। उनका साथीहरू भने सकुशल रहेको जिल्ला प्रहरी कार्यालय धादिङले जनाएको छ।
