गतिशील लोकतान्त्रिक पार्टी नेपालले ‘गतिशील कृषिः उद्यमशील किसान, आत्मनिर्भर कृषि र समृद्ध नेपाल’ नारासहित कृषि क्षेत्रलाई आत्मनिर्भर र उद्यममुखी बनाउने अभियान सुरु गरेको छ।
पार्टीका अनुसार दुई तिहाइभन्दा बढी नेपालीको जीविकोपार्जन कृषिमा निर्भर भए पनि बीउ, मल, सिँचाइ, प्रविधि र बजारको अभावका कारण किसानले आफ्नो मेहनतको उचित मूल्य पाएका छैनन्।
पार्टीले मोरङ र झापा जिल्लामा १५ वर्षको सहकार्य अनुभवका आधारमा विकसित ‘गतिशील कृषि मोडल’ मार्फत धान, मकै र तोरीको मूल्य शृंखला सुधार गर्दै किसानको आम्दानी ३० देखि ५० प्रतिशतसम्म बढाएको जनाएको छ।
आरजु राइस मिलमार्फत हाल ३ हजार बिघा क्षेत्रका किसानसँग सहकार्य भइरहेको र ४८ घण्टाभित्र खरिद तथा भुक्तानी हुने प्रणालीले किसानको विश्वसनीयता बढाएको उल्लेख छ।
पार्टीले यो मोडललाई अब मकै, तोरी र पशुपालनसम्म विस्तार गर्दै बहुफसल सहकारी खेती प्रणालीमा रूपान्तरण गर्ने तयारी गरेको छ।
नयाँ अवधारणाअनुसार किसानले पनि मिलका सेयर धनी बन्नेछन्।
प्रस्तावित १६ मेट्रिक टन क्षमताको मिल १५ हजार बिघा सहकारी खेतीमा आधारित हुनेछ, जसबाट किसानलाई वार्षिक करिब ५० हजार रुपैयाँ नाफा हुने अनुमान गरिएको छ।
कृषि मोडल अन्तर्गत किसानलाई बीउ, मल, सिँचाइ, बाली बीमा, सहज कर्जा र डिजिटल भुक्तानी प्रणाली उपलब्ध गराइनेछ।
सरकारले पूँजीगत ऋणमा ब्याज अनुदान, पूर्वाधारमा लगानी र कर छुटका व्यवस्था गर्नुपर्ने पार्टीको धारणा छ।
प्रारम्भिक चरणमा ५ राइस मिल सञ्चालन गर्ने योजना छ, जसबाट देशभर १५ स्थानमा विस्तार गर्दै २ लाख ३० हजार बिघा खेती, १५ हजार रोजगारी र ७० अर्ब रुपैयाँको आयात प्रतिस्थापन सम्भव हुने अनुमान गरिएको छ।
-1746009348.jpg)
