नख्खुस्थित कारागारमा शुक्रबार दिउँसो २ बजे हानाहान हुनअघि कैदी पूर्णबहादुर राजी र पवनकुमार महतो ‘जुम्रा हेराहेर’ गरिरहेका थिए। कारागार प्रशासनका अनुसार नयाँ ब्लकको दक्षिणपट्टि दुवै जना आपसमा जुम्रा मारेर बसिरहेका थिए।
दुई जनाकै मानसिक सन्तुलन ठिक थिएन। पूर्णबहादुरले औषाधी खाँदै थिए। पवनकुमारले औषधी छुटाएका थिए।
‘एकैछिनमा आपसमा झगडा परेर हानाहानको दृश्य देखेपछि सुरक्षाकर्मी पुग्दा पवनकुमारले पूर्णबहादुरलाई टाउकोमा ढुंगा हान्न भ्याइसकेछन्,’ जेलर वेदप्रकाश अर्यालले भने, ‘उनको टाउकोमा गम्भीर चोट लागेको थियो। उपचार गर्न वीर अस्पताल पुर्याउँदा मृत्यु भएको हो।’
अर्यालका अनुसार आपसमा कुराकानी र घोचपेच गर्ने क्रममा उनीहरूबीच हात हालहाल हुन थालेको थियो।
दुवै कर्तव्य ज्यान मुद्दाका कैदी हुन्। पवनकुमार २०७४ सालमा नख्खु कारागार सरुवा भएर आएका थिए। सर्लाहीका ४५ वर्षीय महतो कर्तव्य ज्यानमुद्दामा २०७१ सालमा जेल परेका थिए। सर्लाही जिल्ला कारागारबाट, झुम्का हुँदै उनी नख्खु आइपुगेका थिए।
३७ वर्षीय मृतक राजी बर्दिया जिल्लाका हुन्। उनी २०७२ माघ २२ गते बर्दिया कारागार चलान भएका थिए। प्यूठान हुँदै उनी २०७३ साल पुस महिनामा नख्खु कारागार ल्याइएका थिए।
ललितपुर प्रहरी परिसरका अनुसार मृतकको शव पोस्टमार्टमका लागि त्रिवि शिक्षण अस्पताल लैजाने तयारी भइरहेको छ। घटनाबारे अनुसन्धान गर्न प्रहरी नायब उपरीक्षकको नेतृत्वमा टोली खटाइएको परिसर प्रमुख एसएसपी रबिन्द्र धानुकले बताए।
‘वादविवाद हुँदै हानाहान भएको र त्यसक्रममा राजीको टाउकोमा ढुंगा हानिएको थाहा भएको छ,’ धानुकले भने, ‘टाउकोमा गहिरो चोट लागेकाले तत्कालै मृत्यु भएको बुझिएको छ।’
-1753341424.jpeg)
-1746009348.jpg)
