संस्कृति पर्यटन तथा नागरिक उड्डयन मन्त्री योगेश भट्टराईले नेपाली सेनाको ब्यारेक र घोडाफर्म अन्यत्र सारेर भरतपुर विमानस्थलको विस्तार गर्ने तयारी भइरहेको बताएका छन्।
भरतपुर महानगरमा भएको छलफल कार्यक्रममा उनले हाल ब्यारेक रहेको स्थानमा विमानस्थलको गुरूयोजना नबिग्रनेगरी नेपाली सेनाको आपतकालीन एयर बेसक्याम रहने बताए।
हालको अवस्थामा भरतपुर विमानस्थल जोखिममा रहेको भन्दै मन्त्री भट्टराईले अब भरतपुर महानगरपालिकाले मापदण्ड विपरितका घर तथा अग्ला घरहरू भत्काउनुपर्ने बताए।
‘सुविधा सम्पन्न विमानस्थल पनि चाहिने र घर पनि अग्लो चाहिने कुरा उपयुक्त हुन सक्दैन,’ उनले भने, ‘विमानस्थल निर्माणमा सबैको सकारात्मक सहयोग आवश्यक छ।’
उनले भरतपुर विमानस्थलको विस्तारबाट यस क्षेत्रको पर्यटन विकासमा टेवा पुग्ने बताउँदै भने, ‘विस्तारको काम सुरु भैसक्यो यसलाई सम्पन्न गर्न आइपर्ने असजिला तथा अवरोधहरुलाई व्यवस्थापन गर्दै जानुपर्छ।’
विभिन्न चरणमा विमानस्थल विस्तारका लागि छलफल र संभाव्यता अध्ययन पूरा गरी निर्माणको निचोडमा पुगेको उनले बताए। पार्टी अध्यक्ष प्रचण्ड, महानगर प्रमुख रेनु दाहाल तथा जनस्तरबाट विमानस्थल विस्तार गर्न तीब्र दवाव आइरहेको उनले बताए।
भरतपुर महानगर प्रमुख दाहालले महानगरपालिकाले भरतपुर विमानस्थललाई रात्रिकालीन उडानसहितको व्यवस्थित र सुविधा सम्पन्न विमानस्थलकोरुपमा विस्तार गर्न चाहेको बताइन्। उनले यो विमानस्थलको विस्तार र विकासले चितवन र यस आसपासका जिल्लाहरूको समग्र विकासमा उल्लेख्य टेवा पुग्ने बताइन्।
विमानस्थल विस्तारको क्षेत्रमा पर्ने नेपाली सेनाको कालीबहादुर गण र नेपाली सेनाकै गोडा प्रजनन केन्द्रलाई सेनासँगको समन्वयमा उचित स्थानमा व्यवस्थापन गर्ने सहमति भैसकेको उनले बताइन्। सो को सम्पूर्ण विवरण पर्यटन मन्त्रालयमा पठाइसकिएको पनि उनले बताइन्।
सहरको मध्य भागमा रहको विमानस्थल साँघुरो हुँदा जोखिम बढेको भन्दै केही वर्षयता विमानस्थल विस्तार वा स्थानान्तरणको बहस हुँँदै आएको छ।
