पश्चिममा नेपाल र भारतको सीमा छुट्याउने महाकाली नदीमाथि दार्चुलामा मोटरेबल पुल बन्ने भएको छ।
भारतीय विदेशमन्त्री एस जयशंकरले महाकालीमाथि पुल बनाउने विषयमा बिहीबार मन्त्रिपरिषदबाट निर्णय भएको बताएका छन्।
बिहीबार साँझ सामाजिक सञ्जाल ट्वीटरमा जयशंकरले लेखेका छन्, 'प्रधानमन्त्री नरेन्द्र मोदीको नेतृत्वमा आजको मन्त्रिपरिषदले महत्वपूर्ण निर्णय गरेको छ। नेपाल र भारतबीच दार्चुलामा महाकाली नदीमाथि पुल बनाउने एमओयू। हाम्रो मित्रतापूर्ण सम्बन्ध अझ गहिरो बनाउन एक महत्वपूर्ण कदम।'
बिहीबार दिउँसो परराष्ट्रमन्त्री नारायण खड्का र एस जयशंकरबीच टेलिफोनमा कुराकानी भएको थियो। दुई मन्त्रीबीचको कुराकानीमा यो विषयबारे चर्चा भए/नभएको स्पष्ट भइसकेको छैन।
दार्चुलाका प्रमुख जिल्ला अधिकारी सिद्धराज जोशीले महाकालीमाथि मोटरेबल पुल बनाउने चर्चा पहिलादेखि नै भएको बताए।
'दार्चुला सदरमुकामबाट डेढ किलोमिटर परको असीगडा र भारतको काकँडा जोड्ने पुल बनाउने कुरा अलि पहिलादेखिकै हो,' प्रजिअ जोशीले सेतोपाटीसँग भने, 'भदौमा भारतीय प्राविधिक आएर यहाँको माटो पनि परीक्षण गरेर गएका थिए। पिथौरागढका अधिकारीहरूले केही दिनअघि भएको छलफलमा पनि पुलको काम छिट्टै अघि बढाउने बताएका थिए। आज भारतको मन्त्रिपरिषदले निर्णय गर्यो भन्ने सुनेका छौं।'
अहिले महाकाली नदीमा कञ्चनपुरको गड्डाचौकीमा मात्रै भारतसँग जोड्ने मोटरेबल पुल छ। त्यहाँभन्दा माथि ठाउँ-ठाउँमा झोलुंगे पुल छन्। दार्चुला सदरमुकाम र भारतीय बजार धार्चुला जोड्ने पुल पनि झोलुंगे पुल नै हो।
दार्चुलामा भारतीय पक्षले आफ्नै लगानीमा पुल बनाउने कुरा भएको प्रजिअ जोशीले बताए। उक्त पुल बने दार्चुलावाासीलाई भारत आउन-जान निकै सहज हुने उनको भनाइ छ।
-1746009348.jpg)
