नेकपा एमालेका अध्यक्ष केपी शर्मा ओलीले अहिलेको सरकार सरकारमा बस्न नै सुहाउने खालको नभएको बताएका छन्।
उनले अहिलेको सरकारलाई सरकारमा बस्न जनताले आदेश नदिएको पनि बताएका छन्।
आज एमाले जिल्ला अधिवेशन भर्चुअल रूपमा उद्घाटन गर्दै अध्यक्ष ओलीले भने, ‘अहिलेको सरकार सरकारमा बस्न सुहाउने नै सरकार होइन। यो सरकारलाई जनताले सरकारमा बस्न आदेश नै दिएको थिएन।’
जनताले आदेश नदिएका मानिसहरू अन्यत्रैबाट सरकारमा पुगेको उनको भनाइ थियो।
नेपाली कांग्रेसका सभापति शेरबहादुर देउवा गठबन्धनबाट प्रधानमन्त्री नियुक्त भएका थिए। देउवालाई असार २८ मा सर्वोच्च अदालतले प्रधानमन्त्री नियुक्त गर्न परमादेश दिएको थियो।
अध्यक्ष ओलीले सरकार बनेको संसदले पनि थाहा नपाएको बताएका छन्।
‘संसदले सरकार परिवर्तन भएकै थाहा पाएन। प्रधानमन्त्री हटेको र अर्को प्रधानमन्त्री नियुक्ति र सपथ लिएको संसदले थाहा पाएन। एकैचोटी विश्वासको मत लिने नाटक मात्रै देख्यो।’
उनले यस्तो हुनुलाई 'असंवैधानिक नाटक' भनेका छन्। साथै सत्तारूढ गठबन्धनलाई ओलीले प्रतिगामीको आरोप लगाएका छन्।
‘जनताले अब यस्ता नाटक बन्द गर्नुपर्छ। झन्डै तीन करोड नेपालीले मतपत्रबाट आफ्ना आवाज प्रष्फूटित गर्नुपर्छ,’ उनले भने।
-1746009348.jpg)
