लुम्बिनी प्रदेशका सात वटा जिल्लामा सर्वसम्मत रूपमा नेतृत्व चयन गरेको नेकपा एमालेले दुई वटा जिल्लामा भने निर्वाचनबाट नेतृत्व गरेको छ। तराईका ६ र पहाडका ६ गरी १२ जिल्ला रहेको लुम्बिनी प्रदेशका दुई वटा जिल्लामा भने अधिवेशन भएको छैन।
हिमाली जिल्ला मानिने रूकुम पूर्वमा यसअघि नै पुसपछि मात्रै अधिवेशन गर्ने निर्णय गरिएको थियो भने रोल्पामा अधिवेशन तय गरिए पनि जिल्ला सचिवको निधन भएकोले स्थगित गरिएको थियो। शुक्रबार नै अधिवेशनको उद्घाटन गरिएको प्युठानमा आजमात्रै नेतृत्व चयनको प्रक्रिया सुरू गरिएको एमालेले जनाएको छ।
प्युठानमा अध्यक्ष पदमा विजयविराज बिष्ट, नेहरसिंह केसी, अजय सिंह र मधुर शर्मा गरी चार जनाको उम्मेदवारी परेको छ। त्यस्तै सचिवमा दुई तथा उपाध्यक्ष र सहसचिवमा पनि ४/४ जनाको उम्मेदवारी परेको निर्वाचन समितिले जनाएको छ।
अधिवेशन सम्पन्न भएका जिल्लामध्ये सात वटामा नेतृत्वको लागि सहमति जुटे पनि कपिलवस्तु र पश्चिम नवलपरासीमा भने निर्वाचनबाट नेतृत्व चयन गरिएको हो।
नेतृत्व चयनको लागि निर्वाचन भएको कपिलवस्तु अध्यक्षमा डम्मर शर्मा विजयी भएका छन्। अध्यक्षका लागि शर्मासँगै बाबुराम खनाल र नेत्रराज अधिकारीले दाबी नछोडेपछि शनिबार मतदान गरिएको थियो। मतदानमा शर्माको पक्षमा २ सय ३८ मत खस्दा खनालको पक्षमा १ सय ८६ र अधिकारीको पक्षमा १ सय मत खसेको निर्वाचन समितिले जनाएको छ।
अध्यक्षसँगै उपाध्यक्ष, सचिव र उपसचिव पनि मतदानबाट चुनिएका छन्। जसअनुसार उपाध्यक्षमा ३ सय ४५ मत लिएर विश्रामप्रसाद थारू निर्वाचित हुँदा उनका प्रतिष्पस्धी हिरालाल पौडेलले १ सय ६६ मत मात्रै ल्याएका छन्।
त्यस्तै तीन जनाले प्रतिष्पर्धा गरेको सचिवमा विश्व कार्की निर्वाचित भए। कार्कीले १ सय ७९ मत ल्याउँदा उनका प्रतिष्पर्धी शिवी गहतराजले १ सय ७४ र भेषराज पाण्डेले १ सय ६३ मत ल्याएका थिए।
उपसचिवमा अर्जुन केसी १ सय ३१ मत ल्याएर विजयी भएका छन्। उपसचिवमा उम्मेदवारी दिएका विकास आचार्यले ६१, तेजेन्द्र पाण्डेले ५८ र विनोद चौधरीले २६ मत ल्याएका थिए।
उता पश्चिम नवलपरासीमा पनि सहमति नजुटेपछि मतदानबाट दीपेन्द्र कार्की अध्यक्षमा निर्वाचित भएका छन्। शनिबार अबेर राति सकिएको मतगणनाको परिणामअनुसार कार्कीले २ सय ३२ मत ल्याएर विजयी हुँदा उनका प्रतिष्पर्धी थानप्रसाद गैरेले १ सय ८५ मत ल्याएका थिए। नवलपरासीको उपाध्यक्षमा डोलराज भण्डारी, सचिवमा धिरज शर्मा बस्याल र उपसचिवद्वयमा राजनकुमार आचार्य र रिंगला यादव निर्वाचित भएका छन्।
बाँकी सात वटा जिल्लामा भने सर्वसहमतिमा नेतृत्व चयन गरिएको एमालेले जनाएको छ। जसअनुसार रूपन्देहीमा तेजेन्द्र केसीको अध्यक्षतामा जिल्ला कार्यसमिति चयन गरिएको छ। यसअघि जिल्ला उपाध्यक्षसमेत रहेका पुरुषोत्तम घिमिरेले शनिबार अध्यक्षमा उम्मेदवारी दिए पनि आइतबार दिउँसो केसीलाई समर्थन गर्दै आफ्नो उम्मेदवारी फिर्ता लिएपछि निर्वाचन प्रक्रियामा नगई केसी अध्यक्षमा निर्वाचित भएका हुन्।
एमाले र माओवादी पार्टी एकीकरणपछि नेकपा बनेको बखत रूपन्देही जिल्ला सहसंयोजक रहेका केसी यसअघि क्षेत्र नम्बर २ का क्षेत्रीय संयोजक थिए। त्यस्तै उपाध्यक्षमा जागेश्वरदेवी चौधरी, सचिवमा यज्ञ गैह्रे र उपसचिवद्वयमा चित्रबहादुर कार्की र हितराज पन्थी पनि सर्वसम्मत चुनिएका छन्। सचिवमा पनि गैह्रेसँगै खेमप्रसाद लुइँटेलले उम्मेदवारी दिए पनि लुइँटेलले आफ्नो उम्मेदवारी फिर्ता लिएका हुन्।
नेकपा एमाले अर्घाखाँचीमा पिताम्बर भुसालको अध्यक्षतामा सर्वसम्मत नयाँ नेतृत्व निर्वाचित भएको छ। एमाले लुम्बिनी प्रदेश कमिटी सदस्य रहेका भुसालबाहेक अध्यक्षमा अरू कसैले दाबी नगरेपछि शनिबार दिउँसो नै कार्यसमिति चयन गरिएको थियो। अधिवेशनपूर्व यसअघिको कार्यसमितिमा उपाध्यक्ष रहेका जीवनारायण कोइरालाले भुसाललाई नै समर्थन गर्दै उम्मेदवारी नदिएपछि नेतृत्व चयनमा कुनै समस्या नभएको एमाले अर्घाखाँचीले जनाएको छ।
लुम्बिनी प्रदेशको राजधानीसमेत रहेको दाङमा हुकुमबहादुर बस्नेत एमाले अध्यक्ष निर्वाचित भएका छन्। शनिबार सम्पन्न १३ औं जिल्ला अधिवेशनले यसअघि उपाध्यक्ष रहेका बस्नेतको अध्यक्षतामा १ सय २१ सदस्यीय नयाँ कार्यसमिति चयन गरेको हो। जिल्लाको उपाध्यक्षमा राममणि पाण्डे, सचिवमा मनोहर बुढाथोकी, उपसचिव कृष्ण भुसाल र हीरादेवी पुन चयन भएका छन्।
पाल्पामा पनि धनेन्द्रराज घिमिरेको अध्यक्षतामा १ सय ५ सदस्यीय नयाँ नेतृत्व चयन भएको छ। उपाध्यक्षमा देवीलाल लामिछाने, सचिवमा रामजी पोखरेल र उपसचिवमा टीका थापा तथा सुनिता शर्मा चयन भएका छन्।
त्यसैगरी गुल्मी जिल्ला अध्यक्षमा बालसिंह काउछा, बाँके अध्यक्षमा किस्मत कुमार कक्षपति र बर्दिया जिल्ला अध्यक्षमा लालबहादुर श्रेष्ठ सर्वसम्मत चयन भएको एमालेले जनाएको छ। बर्दिया जिल्ला अध्यक्षमा निर्वाचित श्रेष्ठ बढैयाताल गाउँपालिका अध्यक्ष समेत हुन्।
-1746009348.jpg)
