नेपालमा पनि मनाइयो अन्तर्राष्ट्रिय योग दिवस (तस्बिरमा)

नारायण महर्जन

काठमाडौं, असार ७

चौथो अन्तर्राष्ट्रिय योग दिवस आज मुलुकभर योग र आयुर्वेदसम्बन्धी विभिन्न चेतनामूलक कार्यक्रम गरी मनाइँदैछ।

पतञ्जलि योगपीठ नेपालको आयोजनामा बिहान ६ बजेदेखि ८ बजेसम्म काठमाडौंसहित सबै जिल्लामा एकसाथ योग शिविर सञ्चालन भएको छ।

काठमाडौंको महेन्द्र पुलिस क्लबमा भएको कार्यक्रममा सरकारका उच्च पदस्थ अधिकारी, कुटनीतिक नियोगका पदाधिकारी, नेपालका लागि भारतका राजदूत मञ्जिभसिंह पुरीलगातयको उपस्थिति थियो।

कार्यक्रममा पतञ्जलि योग समिति नेपालका प्रमुख लवदेव मिश्र र योग दिवस आयोजक समितिका संयोजक ज्ञानेन्द्रविक्रम महतले पूर्वीय दर्शनको एउटा महत्वपूर्ण उपहारका रूपमा योगलाई विश्वसामू परिचित गराउनु आवश्यक रहेको बताए।

अन्तर्राष्ट्रिय योग दिवसका अवसरमा सबै जिल्लामा पतञ्जलि योग समिति नेपालका जिल्लास्तरीय समितिमार्फत विद्यालय र समुदायलाई लक्ष्य गरी असार १ गतेदेखि साताव्यापी रूपमा योग र प्राणायामका चेतनामूलक कार्यक्रम सञ्चालन भइरहेको योगपीठले जनाएको छ।

संयुक्त राष्ट्र संघले सन् २०१५ देखि जुन २१ लाई अन्तर्राष्ट्रिय योग दिवसका रूपमा मनाउन सुरु गरेको हो।

अन्तर्राष्ट्रिय योग दिवस मनाउने सन्दर्भमा सन् २०१४ मा राष्ट्र संघको महासभामा भारतका प्रधानमन्त्री नरेन्द्र मोदीले गरेको प्रस्ताव र नेपालका तत्कालीन प्रधानमन्त्री सुशील कोइरालाले गरेको समर्थनलाई विश्वका १ सय ७० भन्दा बढी देशले समर्थन गरिसकेका छन्।