आज मुस्लिम समुदायले मनाउने एक महिने रमदान उल मुबारक अन्तिम शुक्रबार। यो वर्षको रमदानको अन्तिम शुक्रबार भएकाले राजधानीको घन्टाघरमा रहेका मस्जिदहरूमा प्रार्थना गर्न आउने मुस्लिम धर्मालम्वीको भीड लागेको छ।
अरबिक पात्रोअनुसार रमदान नवौं महिनाको अन्तिम दिन आकाशमा चन्द्रमा देखिएपछि महिना दिनको रोजा (व्रत) सकिन्छ। यसपालि इदमा सार्वजनिक बिदा दिने निर्णय गरेको छ।
अरबी पात्रोअनुसार दसौं महिना (सब्बाल) को पहिलो तारिखदेखि इद उल फितर सुरु हुन्छ। इदलाई मुस्लिमहरूले खुसीको पर्वका रूपमा मनाउँछन्। नेपाली जामे मस्जिदका सचिव मन्सुर सेनका अनुसार धनी वर्गले एक वर्षभित्र आफूले सुनचाँदी, नगद वा जिन्सी जति बचत गर्छ त्यसको २.५ प्रतिशत गरिब, दीनदु:खी वा विपन्नलाई दान दिनुपर्छ। यसलाई जकात भनिन्छ। यो पर्वका दिन सबैले बिहान नियमित नमाज पढेपछि सफासुग्घर भएर चोखो लुगा लगाएर जामे मस्जिदमा भेला हुन्छन्। त्यसपछि तोकिएको समयमा इद उल फितरको विशेष नमाज सामूहिक रूपमा पढ्ने गर्छन्। नमाजपछि एकअर्कामा अंकमाल गरी शुभकामना साटासाट गर्ने चलन छ।
इस्लामिक पात्रो चान्द्रमासबमोजिम चल्ने हुनाले हरेक वर्ष नेपाली पात्रोअनुसार रमदान महिना १२-१३ दिनअघि सर्दै आउँछ। 'रमदान महिनाको मुख्य उद्देश्य निराहार व्रत बसी अति अनुशासित ढंगबाट जीवन बिताउन लगाउनु हो', नेपाली जामे मस्जिद काठमाडौंका अध्यक्ष अमर खानले भने, 'विपन्न वर्गले महसुस गर्ने भोक, प्यास सम्पन्न वर्गलाई समेत महसुस गराउनु पनि यो पर्वको उद्देश्य हो।'
इस्लाम धर्मको नियमानुसार हरेक मुस्लिमले रोजा बस्नु अनिवार्य गरिएको हुन्छ। इस्लामका क ल्मा (श्लोक), नमाज, रोजा, हज र जकातमध्येको एक आधारका रूपमा रोजालाई लिइन्छ।
हेर्नुस् तस्बिरहरू :
