अभिभावक नभएका बेला घरको आँगनमै खेलिरहेकी मोरङ कटहरीकी ४ वर्षीया नाबालिका बलात्कारको शिकार बनेकी छन्।
अपराधीको हिंस्रक आक्रमणमा परेकी बालिका यतिबेला कोशी अस्पतालको उपचार कक्षमा गम्भीर अवस्थामा छिन्।
बलात्कार आरोपमा भारत विहारको अररिया घर भई मोरङको कटहरीमा बस्दै आएका २४ वर्षीय मुकेश सरदार पक्राउ परेका छन्। सरदारले घरमा खेल्दै गरेकी बालिकालाई स्थानीय लोहन्द्रा खोलामा लगेर शनिबार राति ८ बजे जबरजस्ती करणी गरेको मोरङ प्रहरीका प्रवक्ता डिएसपी दिपक श्रेष्ठले जानकारी दिए।
श्रमिक काम गर्ने सरदार शनिबार साइकलमा डुल्दै ती बालिकाको घरतिर आएका थिए। बालिकाका बाबुआमा खेती किसान गर्छन्। अहिले धान थन्क्याउने सिजन भएकोले उनीहरू मेलापातमा गएका थिए।
‘त्यसदिन घरमा ती बालिका एक्लै थिइन्। कोही नभएको मौका छोपेर सरदार आएर बालिकालाई साइकलमा हालेर घरबाट करिब ७ सय मिटर नजिक रहेको लोहन्द्रा खोलामा लगेर जबरजस्ती करणी गरेछन्। त्यसपछि बालिकालाई ढुंगा प्रहार गरेका रहेछन्। घरमा छोरी नभेटेपछि हामी खोज्दै लोहन्द्र खोलामा पुग्दा अर्धनग्न अवस्थामा छोरी अचेत अवस्थामा थिइन्,’ ती बालिकाका आफन्तले भने, ‘योनीदेखि रगत बगिरहेको थियो। अनुहार र शरीरभरी चोटपटक लागेको छ।’
पीडित बालिकाको उपचार अहिले कोशी अस्पतालमा भइरहेको छ। बालिकाको अवस्था चिन्ताजनक छ। उनी रूने कराउने, चिच्याउने र घरीघरी बेहोस हुने गर्छिन्। उनको जीउ भरी निलडामहरू छन्। बलात्कृत बालिकाका अभिभावकको आर्थिक अवस्था ज्यादै नाजुक भएकोले औषधि उपचार गर्नसमेत नसकेको पीडितका आफन्तले बताएका छन्।
नाबालिकालाई बलात्कार गर्ने सरदारलाई शनिबार राति नै प्रहरीले पक्राउ गरेको मोरङ प्रहरीका डिएसपी श्रेष्ठले जानकारी दिए। आइतबार मोरङ अदालतमा जबरजस्ती करणी मुद्दामा पाँच दिनको म्याद थप गरी अनुसन्धान सुरू गरेको उनले बताए।
-1746009348.jpg)
