दोलखामा एकै परिवारका तीन जना मृत फेला परेका छन्।
बुधबार बिहान तामाकोशी नगरपालिका वडा नम्बर २ झुलेस्थित एक घरमा श्रीमान-श्रीमती र नाबालक मृत फेला परेको जिल्ला प्रहरी कार्यालय दोलखाका प्रहरी निरीक्षक अन्जन कोइरालाले जानकारी दिए।
मृत्यु हुनेमा २७ वर्षीय श्याम तामाङ, २५ वर्षीया अम्बिका र ६ दिनको नाबालक मृत फेला परेका हुन्।
वडा नम्बर २ झुलेका अध्यक्ष हर्कबहादुर योञ्जनका अनुसार उनीहरूको निस्सासिएर मृत्यु भएको देखिएको छ।
गएराति खाना खाएपछि कोठामा मकल बालेर सुतेका उनीहरू बिहान अबेरसम्म पनि नउठेपछि आफन्तले बोलाउन जाँदा मृत फेला परेको उनले बताए।
'मकलमा कोइला बालेर सुतेको गुम्सिएर अक्सिजनको कमीले मृत्यु भएको देखिन्छ। कोठामा प्वाल नै नभएको देखिन्छ,' उनले भने, 'अक्सिजन नछिरेपछि बिते। बिहान घरका मान्छेले किन उठेनन् भनेर ७ बजे उठाउन गएका थिए। मैले बिहान आठ बजे थाहा पाएँ।'
घटनाबारे प्रहरीलाई ९ बजेतिर खबर भएको थियो।
प्रहरीको प्रारम्भिक अनुसन्धानबाट पनि उनीहरूको निस्सासिएरै मृत्यु भएको आशंका गरिएको प्रहरी नायब उपरीक्षक भेषराज रिजालले बताए।
अरू घर परिवार नजिकैको अर्को घरमा बस्थे। दम्पतीका ६ वर्षका छोरा पनि छन्।
श्याम गाउँमा खेती किसानी गर्थे। प्रहरी घटनास्थल पुगे पनि शव पोष्टमार्टमको लागि घर परिवार तथा गाउँलेले लैजान नदिएको उनले बताए।
'प्रहरीले पोष्टमार्टमको लागि शव लग्ने कुरा गर्नुभयो। तर यहाँ घर-परिवार आफन्त लगायत जनमानिसले चाहिँ लैजान दिएको छैन,' उनले भने, 'मर्ने मरिसक्यो बच्ने होइन किन दु:ख गर्ने भन्ने कुरा आयो।'
प्रहरीले भने पोष्टमार्टमको लागि शव उठाउने प्रयास गरिरहेको प्रहरी नायब उपरीक्षक रिजालले बताए।
'कसैले मारेको होइन। दुई तीन घण्टा लगाएर शव ओहोरदोहोर मात्रै हुन्छ भनेर पोष्टमार्टमको लागि नलैजान माग राख्नुभएको हो। हामीले मनाउने प्रयास गर्दैछौं,' उनले भने, 'कर्तव्य नभएको भन्दै त्यस्तो भनेका हुन्।'
थप अनुसन्धान गर्न प्रहरी घटनास्थल पुगेको छ।