बुटवल उपमहानगरपालिकाले बहुतले पार्किङसहितको बहुउद्देश्यीय भवन निर्माणको योजना बनाएको छ।
लुम्बिनी बस टर्मिनल परिसरमा आधुनिक सपिङ कम्प्लेक्सका सम्पूर्ण सुविधासहित ‘बुटवल सिटी सेन्टर’ बहुउद्देश्यीय भवन बनाउने योजना अगाडि सारिएको उपमहानगरपालिकाले जनाएको छ।
उक्त भवन वहुवर्षे योजनाका रूपमा सार्वजनिक–निजी साझेदारीमा अगाडि बढाइएको उपमहानगरपालिकाका प्रमुख शिवराज सुवेदीले जानकारी दिए।
सुवेदीका अनुसार बुटवल वडा नं. ९ मा रहेको बस टर्मिनल क्षेत्रमा बहुतला पार्किङसहितको बहुउद्देश्यीय भवन निर्माण, सञ्चालन तथा हस्तान्तरण आयोजना अवधारणमा कार्यान्वयनको प्रक्रिया अगाडि बढाइएको हो।
उपमहानगरपालिकाले भवन निर्माणको लागि बस टर्मिनल क्षेत्रको कित्ता नम्बर ५ को करिब चार विगाहा क्षेत्रफल छुट्याईसकेको छ।
करिब दुई अर्ब बराबरको लागत अनुमान गरिएको योजनामा अहिले भवन निर्माणलगायतका प्रक्रियाका लागि सार्वजनिक सूचना जारी गरिएको छ।
बुटवल उपमहानगरको भवन निर्माण सम्बन्धी मापदण्ड २०७४ खारेज गर्दै नयाँ मापदण्ड बनाएसँगै अब बुटवलमा तोकिएको क्षेत्रमा बहुतले भवन निर्माण गर्न सकिनेछ। बढ्दो जनघनत्व र जग्गाको अभावलाई मध्यनजर गर्दै नयाँ अवधारणा बनाइएको प्रमुख सुवेदीले जानकारी दिए।
उपमहानगरपालिकाले सार्वजनिक जग्गाको संरक्षण गरि खुला क्षेत्र बनाइने, बजार क्षेत्रमा सम्भाव्यता अध्ययन गरेर बहुतले भवन निर्माणको स्वीकृति दिनेगरी नयाँ मापदण्ड बनाएको हो।
स्थानीय सरकार सञ्चालन ऐन २०७४ को दफा २७, ४३, ४४ समेतले दिएको अधिकार प्रयोग गरी भवन निर्माण सम्बन्धी मापदण्ड, २०७७ बनाएको थियो ।
उपमहानगरपालिकाका प्रवक्ता रामप्रसाद रेग्मीले साझेदारीमा काम गर्न इच्छुक तथा योग्य कम्पनी/संस्थालाई आवेदन पेश गर्न सार्वजनिक सूचना आह्वान गरिएको बताए।
पहिलो सूचनाका आधारमा तीन वटा राष्ट्रिय निजी कम्पनीले भवन निर्माणको लागि चासो राखेका छन्।
उपमहानगरका सहरी विकास तथा योजना महाशाखा प्रमुख एवं वरिष्ठ इन्जिनियर सुमन श्रेष्ठले कम्पनी छनोट भएलगत्तै निर्माण कार्य अगाडि बढाइने बताए। निर्माणस्थलको सर्भे, माटो परीक्षण, वातावरणीय प्रभावलगायतका प्रक्रिया पूरा भइसकेको उनले बताए।
यस्तै पछिल्लो चार वर्षको अवधिमा विभिन्न संघसंस्था तथा व्यक्तिले प्रयोग गर्दै आएको बुटवलको करिब तीन सय विगाहा सार्वजनिक जग्गा संरक्षण गरि सरकार मातहत ल्याईएको उपमहानगर प्रमुख सुवेदीको दाबी छ।
1638768731.jpg)
-1746009348.jpg)
