दाङ तुलसीपुरकी एक सात महिनाकी गर्भवतीको मृत्यु भएपछि माइती पक्षले श्रीमानविरूद्ध आत्महत्या दुरुत्साहन मुद्दा दिएका छन्।
इलाका प्रहरी कार्यालय तुलसीपुरले माइती पक्षले ज्वाइँविरूद्ध आत्महत्या दुरुत्साहन मुद्दा दर्ता गर्न ल्याएको जानकारी दिएको छ।
तुलसीपुर उपमहानगरपालिका वडा नं. ९ की २६ वर्षीया उर्मिला केसी वली चैत ३० गते दिउँसो घरमै मृत फेला परेकी थिइन्।
उर्मिलाको एक वर्ष पहिलेमात्रै बिहे भएको थियो।
उर्मिलाको माइती घर रुकुम पश्चिमको त्रिवेणी–७ भए पनि पछिल्लो समय उनका बुवा बाँकेको ढकेरीमा बस्दै आएको उनका माइलो बुवाको छोरा लोकेन्द्र केसीले जानकारी दिए।
दाजु लोकेन्द्रले मुचुल्का उठाउँदा माइती नआउँदै स्थानीय जनप्रतिनिधिको रोहबरमा उठाइएकोप्रति आपत्ति जनाए।
त्यस्तै, उर्मिला मृत फेला परेको कोठामा पानी पोखिएको, कोठामा चुकुल समेत नलगाएको, खाटका कपडाहरू उठाइएको हुँदा आशंका गर्ने ठाउँहरू रहेको दाजु लोकेन्द्रले बताए।
‘मर्ने मान्छेहरूले ढोका थुनेर मर्छ नि,’ लोकेन्द्रले आशंका गरे, ‘ढोका खुल्लै रहनु पनि रहस्यमय मान्न सकिन्छ।’
लोकेन्द्रले आफूहरूले घटना छानबिन गरी दोषीमाथि कारबाहीको माग गर्दै इलाका प्रहरी कार्यालय तुलसीपुरमा निवेदन दिएको जानकारी दिए।
शव पोष्टमार्टमका लागि राप्ती प्रादेशिक अस्पतालमा राखिएको छ। मृतकको दिदी र भाउजु आएपछि मात्रै पोष्टमार्टम गरिने प्रहरीले जनाएको छ।
-1753341424.jpeg)
-1746009348.jpg)
