फिफा विश्वकप २०२६ अन्तर्गत भएको प्रतिस्पर्धात्मक खेलमा टेबोहो मोकोएनाले ८३औँ मिनेटमा पेनाल्टीमार्फत गोल गरेपछि दक्षिण अफ्रिकाले चेक रिपब्लिकसँग १-१ गोलको बराबरी खेलेको छ।
खेल सुरु भएको ५ मिनेट ७ सेकेन्डमै चेक रिपब्लिकका मिचल साडिलेकले गोल गर्दै आफ्नो टोलीलाई सुरुवाती अग्रता दिलाएका थिए। यो जारी विश्वकपको अहिलेसम्मकै सबैभन्दा चाँडो भएको गोल हो।
आफ्नो पहिलो खेलमा मेक्सिकोविरुद्ध पनि सुरुवातमै गोल खाएको दक्षिण अफ्रिकी टोलीले यो खेलमा बिस्तारै लय त समात्यो, तर गोल गर्ने अवसर बनाउन भने निकै संघर्ष गर्यो। उनीहरूले खेलको ७४औँ मिनेटमा मात्र पहिलो पटक सट अन टार्गेट गर्न सकेका थिए।
तर, खेल सकिन १० मिनेटभन्दा कम समय बाँकी छँदा दक्षिण अफ्रिकाको भाग्य बदलियो। थापेलो मासेकोको प्रहार चेक खेलाडी पाभेल सुल्कको हातमा लागेपछि दक्षिण अफ्रिकाले पेनाल्टीको अवसर पायो। उक्त पेनाल्टीलाई मोकोएनाले कुनै गल्ती नगरी पोस्टको बायाँ कुनामा गोल गर्दै खेललाई बराबरीमा ल्याए।
यो बराबरीले दुवै टोलीलाई तालिकामा खासै ठूलो राहत भने दिएको छैन। समूह 'ए' मा मेक्सिको र दक्षिण कोरिया अगाडि रहेका कारण यी दुवै टोलीको अघिल्लो चरण पुग्ने सम्भावना अझै अन्योलमै छ।
यद्यपि, समूहमा तेस्रो स्थान हासिल गर्ने उत्कृष्ट ८ टोलीहरू पनि अन्तिम ३२ मा पुग्न पाउने नियम भएकाले दुवै टोलीका लागि अन्तिम खेल महत्वपूर्ण हुनेछ। ३ अंक जोड्न सके नकआउट चरणमा पुग्न सकिने सम्भावना रहनेछ।
अब दक्षिण अफ्रिकाले जुन २५ मा दक्षिण कोरियाको सामना गर्नेछ भने चेक रिपब्लिकले सोही समयमा आयोजक मेक्सिकोको सामना गर्नेछ।
