आइभोरी कोस्टका अन्तर्राष्ट्रिय फुटबल खेलाडी एली वाहीले क्यानडा प्रवेशको अनुमति पाएका छन्।
यसअघि कानुनी झमेलाका कारण उनलाई क्यानडाले रोक लगाएको थियो, तर अब उनले विश्वकपअन्तर्गत शनिबार जर्मनीविरुद्ध हुने विश्वकपको समूह चरणको खेल खेल्न पाउने निश्चित भएको छ।
२३ वर्षीय यी स्ट्राइकरमाथि फ्रान्सको 'लिग वान' अन्तर्गत नाइस क्लबबाट खेल्दा सट्टेबाजी (स्पट फिक्सिङ) मा संलग्न भएको आरोप छ।
उनले गत मे महिनामा मेजविरुद्धको खेलमा जानीजानी 'पहेँलो कार्ड' खाएको र त्यसबाट सट्टेबाजी बजारमा आर्थिक लाभ उठाउन सहयोग गरेको दाबी गरिएको छ। सोही विषयमा सोधपुछका लागि उनलाई गत महिना पक्राउ समेत गरिएको थियो।
'स्पट फिक्सिङ' भन्नाले खेलको नतिजामा फरन नपारी खेलभित्रका साना घटनाहरू (जस्तै कार्ड खानु वा कर्नर पाउनु) लाई मिलेमतोमा प्रभावित पार्नु हो, जसबाट सट्टेबाजहरूले पैसा कमाउँछन्।
आइभोरी कोस्टको फुटबल संघले सुरुमा वाहीले क्यानडा जाने अनुमति नपाएको बताए पनि बिहीबार ढिलो गरी उनलाई अनुमति प्राप्त भएको जानकारी दिएको छ।
क्यानडाको अध्यागमन विभागले आफ्ना नियमहरू कडा भए पनि विशेष परिस्थितिमा अस्थायी बसोबासको अनुमति दिन सकिने बताएको छ।
यसअघि घानाका थोमस पार्टीलाई भने क्यानडाले प्रवेश अनुमति दिएको थिएन। पार्टीमाथि बेलायतमा बलात्कारका गम्भीर आरोपहरू लागेकाले उनलाई रोकिएको थियो।
तर, वाहीको हकमा भने छानबिन जारी रहेकै अवस्थामा क्यानडाले खेल्ने अनुमति दिएको छ।
