क्यानडाले विश्वकप इतिहासमा आफ्नो पहिलो जित दर्ता गर्दै कतारलाई ६-० को विशाल अन्तरले पराजित गरेको छ।
तर, यो ऐतिहासिक जितको खुसीयालीमा स्टार मिडफिल्डर इस्माइल कोनेको गम्भीर चोटले केही ओझेल पारिदिएको छ। आफ्ना मुख्य खेलाडी घाइते भएपछि क्यानडाका प्रशिक्षक जेसी मार्श मैदानमै भावुक हुँदै रोएका थिए।
भ्यानकुभरमा भएको खेलमा क्यानडा ३-० ले अगाडि रहेको बेला कतारका असिम मदिबो र क्यानडाका कोनेबीच बल खोस्ने क्रममा ठूलो टक्कर भएको थियो। कोनेलाई निकै बेर मैदानमै उपचार गरी स्ट्रेचरमा राखेर बाहिर लगिएको थियो। सुरुमा पहेँलो कार्ड पाएका कतारी खेलाडी मदिबोलाई भिडियो असिस्टेन्ट रेफ्रीको जाँचपछि रातो कार्ड दिइएको थियो।
मैदान बाहिर लैजाँदै गर्दा क्यानडाली समर्थकहरूले कोनेको नाम लिएका थिए। पीडा कम गर्ने औषधि खाइरहेका कोनेले स्ट्रेचरबाटै हात हल्लाएर समर्थकहरूलाई सम्बोधन गरेका थिए। यो जितसँगै क्यानडा नकआउट चरणमा पुग्ने सम्भावना बलियो भएको छ, तर कोनेको चोटले टोलीलाई आगामी खेलहरूमा ठूलो झट्का लाग्न सक्छ।
क्यानडाका लागि काइल लारिनले १६ औँ मिनेटमा गोल गर्दै टोलीलाई सुरुवाती अग्रता दिलाएका थिए। खेलमा जोनाथन डेभिडले सानदार प्रदर्शन गर्दै ह्याट्रिक पुरा गरे। उनले खेलको २९ औँ मिनेट, पहिलो हाफको इन्जुरी समय र खेलको अन्तिम समयमा गोल गरेका थिए।
कतारका लागि खेल निकै चुनौतीपूर्ण रह्यो। ३३ औँ मिनेटमै होमाम एल अमिनले रातो कार्ड पाएपछि कतार १० खेलाडीमा सीमित भएको थियो। दोस्रो हाफमा मदिबोले पनि रातो कार्ड पाएपछि कतार ९ खेलाडीमा मात्रै खुम्चिन पुग्यो।
खेलको ६४ औँ मिनेटमा नेथन सालिबाले फ्रि-किकमार्फत गोल गरेपछि उनले घाइते साथी कोनेको जर्सी उचालेर सम्मान प्रकट गरेका थिए। ७५ औँ मिनेटमा कतारका मोहम्मद अल मन्नाईले आत्मघाती गोल गरेपछि क्यानडा ५-० ले अगाडि बढ्यो। अन्तमा जोनाथन डेभिडले आफ्नो ह्याट्रिक पुरा गर्दै क्यानडालाई ६-० को विशाल जित दिलाए।
अहिले समूह 'बी' मा क्यानडा गोल अन्तरका आधारमा स्विट्जरल्याण्डलाई पछि पार्दै शीर्ष स्थानमा रहेको छ।
