निकोलस पेपेको उत्कृष्ट दुई गोलको मद्दतले आइभोरी कोस्टले कुराकाओलाई पराजित गर्दै विश्वकपको इतिहासमा पहिलो पटक नकआउट चरणमा पुग्न सफल भएको छ।
यसअघि तीन पटक विश्वकप खेलेको आइभोरी कोस्ट सधैँ समूह चरणबाटै बाहिरिने गरेको थियो। तर यस पटक कुराकाओलाई हराउँदै ६ अंकका साथ समूह 'ई' को दोस्रो स्थानमा रहँदै उसले इतिहास रचेको हो।
खेलको सातौँ मिनेटमै यान डियोमान्डेले कुराकाओका डिफेन्डरबाट बल खोसेर दिएको पासमा निकोलस पेपेले गोल गर्दै आइभोरी कोस्टलाई अग्रता दिलाएका थिए। त्यसपछि खेलको ६५ औँ मिनेटमा पूर्व आर्सनल खेलाडी पेपेले नै बायाँ खुट्टाले उत्कृष्ट प्रहार गर्दै व्यक्तिगत दोस्रो गोल गरे र टोलीको जित सुनिश्चित गरे।
कुराकाओ विश्वकप खेल्ने सबैभन्दा कम जनसंख्या भएको देश हो। हारका बाबजुद उनीहरूले राम्रो खेल प्रदर्शन गरे। पहिलो हाफमा जुनिन्हो बाकुनाले गोल गर्ने राम्रो अवसर पाएका थिए तर उनको प्रहार गोलपोस्टको नजिकैबाट बाहिरियो। इक्वेडरसँग बराबरी खेल्दै पहिलो अंक जोडेको कुराकाओले यो प्रतियोगिताबाट धेरैको मन जित्न सफल भयो।
आइभोरी कोस्टको लागि यो जित भावनासँग जोडिएको छ। डिडियर ड्रोग्बा र याया टुरे जस्ता दिग्गज खेलाडीहरू भएको 'गोल्डेन जेनेरेसन' ले समेत आइभोरी कोस्टलाई समूह चरण पार गराउन सकेका थिएनन्। सन् २००६, २०१० र २०१४ मा आइभोरी कोस्ट अभागी सावित हुँदै बाहिरिएको थियो। विशेष गरी २०१४ मा ग्रीससँग अन्तिम मिनेटमा गोल खाएर बाहिरिनु उनीहरूका लागि निकै पीडादायी थियो।
तर, वर्तमान प्रशिक्षक इमर्स फायेको नेतृत्वमा रहेको यो टोलीले आफ्नो मानसिक दृढता सावित गरेको छ। ठूला नाम चलेका स्टार नभए पनि यो टोलीमा बलियो एकता देखिएको छ।
आइभोरी कोस्टले अब दोस्रो चरण (अन्तिम ३२) मा जुन ३० तारिखमा फ्रान्स वा नर्वेमध्ये एकसँग प्रतिस्पर्धा गर्नेछ। अर्कोतर्फ ३ खेलमा १ अंक मात्र जोडेको कुराकाओ प्रतियोगिताबाट बाहिरिएको छ।
