नेदरल्याण्ड्सका फरवार्ड कोडी गाक्पोले गर्वमै सन्तान गुमाएको केही दिनमै देशका लागि गोल गर्दा उनी निकै भावुक देखिए। गोल गरेपछि उनी मैदानमै रोएका थिए।
२७ वर्षीय लिभरपुल स्टार गाक्पोले मोरक्को विरुद्धको अन्तिम ३२ को खेलमा पहिलो गोल गरेका थिए। यद्यपि, निर्धारित समयमा १-१ को बराबरीपछि भएको पेनाल्टी सुटआउटमा नेदरल्याण्ड्स मोरक्कोसँग ३-२ ले पराजित हुन पुग्यो।
गाक्पोकी पार्टनर एवं मोडल नोआ भान डेर बिजेले शनिबार मात्रै यो दुःखद खबर सार्वजनिक गरेकी थिइन्। अक्टोबरमा आफ्नो दोस्रो सन्तानलाई जन्म दिने तयारीमा रहेको यो जोडीले गर्भावस्थाकै क्रममा छोरा गुमाउनु परेको थियो। यति ठूलो पारिवारिक शोकका बाबजुद गाक्पोले टिमसँगै बसेर विश्वकप खेल्ने निर्णय गरेका थिए।
खेलमा गोल गरेपछि गाक्पो घुँडा टेकेर मैदानमा बसे। लगत्तै उनका साथीहरूले उनलाई घेरेर सान्त्वना र समर्थन दिए। नेदरल्याण्ड्स र लिभरपुलका कप्तान भर्जिल भान डाइकले पनि गाक्पोलाई अँगालो हाल्दै सहानुभूति प्रकट गरेका थिए।
शनिबार नोआले सामाजिक सञ्जालमा एउटा फोटो पोस्ट गरेकी थिइन्, जसमा यो जोडीले एउटा सानो टोपी र कम्बलमा हात राखेको देखिन्थ्यो। उनले लेखेकी थिइन्, ‘फुटेको मुटुका साथ हामी यो हृदयविदारक खबर सुनाउँदै छौँ कि गर्भावस्थाकै क्रममा हाम्रो छोराको मृत्यु भयो। तपाईंहरूको माया र सहयोगका लागि धन्यवाद। एलिया राफेल गाक्पो। तिमीलाई सधैँ माया गरिरहनेछौँ। तिमी सधैँ हाम्रो छोरा रहनेछौ।’
गाक्पोले यस विश्वकपका सबै खेलहरू खेलेका थिए र व्यक्तिगत रूपमा कुल तीन गोल गरे। मोरक्को विरुद्धको खेलमा उनलाई ११३औँ मिनेटमा मैदानबाट बाहिर निकालिएको थियो, जसका कारण उनले पेनाल्टी सुटआउटमा भाग लिन पाएनन्।
खेलको अन्तिम समयमा मोरक्कोका इसा डिओपले गोल गर्दै खेललाई बराबरीमा पुर्याएका थिए, जसले गर्दा खेल अतिरिक्त समय र पछि पेनाल्टी सुटआउटसम्म पुगेको थियो। अन्ततः उत्तर अफ्रिकी टोली मोरक्कोले पेनाल्टीमा बाजी मार्दै अर्को चरणमा स्थान बनायो।
