फिफा विश्वकप २०२६ अन्तर्गत अमेरिकाको ह्युस्टनमा भएको अन्तिम ३२ को खेलको पहिलो हाफ सकिएर मैदान बाहिरिँदै गर्दा ब्राजिलका खेलाडीहरूको अनुहारमा ठूलो चिन्ता देखिन्थ्यो।
उनीहरूलाई राम्रोसँग थाहा थियो कि उनीहरुका समर्थकहरूको मुड कस्तो हुनेछ।
ब्राजिल सन् १९६६ पछिकै सबैभन्दा छिटो विश्वकपबाट बाहिरिने र राष्ट्रिय अपमान खेप्ने अवस्थाबाट मात्र ४५ मिनेट टाढा थियो। जापानले पहिलो हाफमा ब्राजिललाई दबाबमा राख्दै अग्रता लिएको थियो र खेल उनीहरूकै नियन्त्रणमा देखिएको थियो। सन् २००२ पछि विश्वकपको नकआउट खेलमा सुरुमा पछि परेर पुनरागमन गर्न नसकेको ब्राजिलका लागि यो हारको सम्भावना निकै वास्तविक देखिन्थ्यो।
तर, प्रशिक्षक कार्लो एन्सेलोटीको क्षमतामा शंका गर्नु गलत साबित भयो। क्लब फुटबलमा कीर्तिमानी सफलता हात पारेका र ब्राजिलको इतिहासमै पहिलो विदेशी प्रशिक्षक बनेका एन्सेलोटी हारको संघारमा पुग्दा पनि शान्त देखिन्थे। उनले पछि भने, ‘मलाई मेरो टोलीमा पूर्ण विश्वास थियो।’
एन्सेलोटीको त्यही धैर्यता र रणनीतिको बलमा ब्राजिलले २४ वर्षपछि पहिलो पटक विश्वकपको नकआउट खेलमा सुरुमा पछि परेर पनि जित निकाल्न सफल भयो। यस जितसँगै ब्राजिलको संकट टरेको छ र अब उसले अन्तिम १६ मा आइभोरी कोस्ट वा नर्वेसँग प्रतिस्पर्धा गर्नेछ।
फुटबल विज्ञहरूका अनुसार यदि ब्राजिल यो खेलमा जापानसँग पराजित भएको भए, त्यो उनीहरूका लागि 'ऐतिहासिक अपमान' हुने थियो। फुटबललाई आफ्नो धर्म मान्ने ब्राजिल जस्तो देशका लागि एउटा एसियाली टोलीसँग अन्तिम ३२ मै हारिनु सहनै नसकिने कुरा थियो।
दोस्रो हाफमा एन्सेलोटीले एउटा मात्र परिवर्तन गरे— चोटग्रस्त लुकास पाक्वेटाको ठाउँमा युवा खेलाडी एन्ड्रिकलाई मैदान पठाए। तर, उनले सबैभन्दा ठूलो परिवर्तन टोलीको खेल्ने शैलीमा गरे। पहिलो हाफमा ब्राजिलले स-साना पास खेलेर जापानको रक्षापंक्ति तोड्न खोजेको थियो, जसमा उनीहरू असफल भए।
दोस्रो हाफमा ब्राजिलले आक्रामक रूपमा धेरैभन्दा धेरै क्रसहरू डि-बक्स भित्र पठाउन थाल्यो। तथ्यांक हेर्दा पहिलो हाफमा १२ पटक मात्र क्रस गरेको ब्राजिलले दोस्रो हाफमा २८ पटक क्रस गर्यो। यसै रणनीतिका कारण क्यासेमिरोले हेडमार्फत बराबरी गोल फर्काए।
खेल बराबरीमा सकिने र पेनाल्टीतिर जाने सम्भावना बढिरहेका बेला, ९५औँ मिनेटमा गेब्रियल मार्टिनेलीले गोल गर्दै ब्राजिललाई २-१ को जित दिलाए। जापानको एउटा सानो गल्ती र ब्रुनो गुइमारेसको उत्कृष्ट पासलाई मार्टिनेलीले गोलमा परिणत गरेपछि ब्राजिलको संकट टर्यो।
जितपछि पूर्व फुटबलरहरूले यसलाई ‘बचाएको’ संज्ञा दिएका छन्। प्रशिक्षक एन्सेलोटीले भने, ‘फुटबलमा गल्तीहरू हुन्छन्, तर ती गल्तीहरूलाई सुधार्दै अघि बढ्नु नै टिमको विशेषता हो।’
जापान जस्तो अनुशासित टोलीलाई हराउनुले ब्राजिलको मनोबल निकै बढेको छ। मैदानमा देखिएको त्यो तनाव र अन्त्यमा मिलेको जितले ब्राजिललाई यस विश्वकपमा अझै बलियो दावेदारको रूपमा उभ्याएको छ।
