विश्वकप फुटबल २०२६ को अन्तिम ३२ को रोमाञ्चक खेलमा एर्लिंग हालान्डले खेलको अन्तिम समयमा गोल गरेपछि नर्वेले आइभोरी कोस्टलाई २-१ गोलले पराजित गरेको छ।
यो जितसँगै नर्वेले अब अन्तिम १६ को भिडन्तमा ब्राजिलसँगको भेट पक्का गरेको छ।
अमेरिकाको डालसमा भएको यस खेलको ८६ औं मिनेटसम्म इंग्लिस क्लब म्यानचेस्टर सिटीका स्टार स्ट्राइकर हालान्ड निकै शान्त देखिएका थिए। खेलमा नर्वेका एन्टोनियो नुसा र आइभोरी कोस्टका अमाद डियालोले एक-एक उत्कृष्ट गोल गरेपछि खेल तनावपूर्ण स्थितिमा थियो। तर, ८६ औं मिनेटमा प्याट्रिक बर्गको पासमा हालान्डले ६ यार्डको दूरीबाट गोल गर्दै नर्वेलाई निर्णायक जित दिलाए।
यस गोलसँगै हालान्डले नर्वेका लागि लगातार १३ वटा प्रतिस्पर्धात्मक खेलमा गोल गर्ने कीर्तिमान बनाएका छन्। यो जित नर्वेका लागि ऐतिहासिक हो, किनभने उसले पहिलो पटक विश्वकपको नकआउट चरणको खेल जितेको छ।
आइभोरी कोस्टका लागि दोस्रो हाफमा मैदान छिरेका अमाद डियालोले ७४ औं मिनेटमा उत्कृष्ट गोल गर्दै खेललाई बराबरीमा ल्याएका थिए। आइभोरी कोस्टका प्रशिक्षक इमर्स फाएले सुरुमा रक्षात्मक रणनीति अपनाउँदै अमादलाई सुरुवाती ११ मा नराख्नु गल्ती सावित भयो।
३९ औं मिनेटमा नर्वेका २१ वर्षीय विङ्गर एन्टोनियो नुसाले डि-बक्सको बायाँतर्फबाट बल अघि बढाउँदै उत्कृष्ट सटमार्फत गोल गरी नर्वेलाई सुरुवाती अग्रता दिलाएका थिए।
म्यानचेस्टर युनाइटेडका युवा खेलाडी अमादले गोल गर्नुअघि रक्षापंक्तिमा पनि उत्कृष्ट बचाउ गरेका थिए। उनले नर्वेका डिफेन्डर टोर्बजोर्न हेगेमको प्रहारलाई गोललाइनबाट क्लियर गरेर गोल हुनबाट जोगाएका थिए। तर, स्टार स्ट्राइकरहरूको दबदबा रहेको यस विश्वकपमा हालान्डलाई रोक्न आइभोरी कोस्ट असफल रह्यो।
यो खेल दुवै देशका लागि ऐतिहासिक थियो। आइभोरी कोस्ट पहिलो पटक विश्वकपको नकआउट चरणमा पुगेको थियो भने नर्वे २८ वर्षपछि यो चरणमा पुगेको हो।
नर्वेका कप्तान मार्टिन ओडेगार्डले शान्त तर प्रभावशाली प्रदर्शन गरे। उनले नुसाको गोलका लागि पास मिलाइदिएका थिए। योसँगै ओडेगार्ड विश्वकपका सुरुवाती तीनवटै खेलमा गोलका लागि पास (असिस्ट) दिने इतिहासकै तेस्रो खेलाडी बनेका छन्। हालान्डले भने यस विश्वकपका ३ खेलमा आफ्नो पाँचौँ गोल पूरा गरे।
अन्तिम १६ मा प्रवेश गरेको नर्वेले जुलाई ५ मा ब्राजिलको सामना गर्नेछ। सो खेलको विजेताले क्वार्टरफाइनलमा इंग्ल्याण्डसँग खेल्नुपर्ने सम्भावना छ।
