नर्वेले विश्वकप २०२६ को अन्तिम ३२ को खेलमा आइभोरी कोस्टलाई पराजित गर्दै इतिहासमै पहिलो पटक नकआउट चरणको खेल जितेको छ।
खेलपछि स्ट्राइकर एर्लिंग हालान्ड, मिडफिल्डर प्याट्रिक बर्ग र प्रशिक्षक स्टेले सोल्बाकेनले फिफासँग आफ्नो अनुभव साटेका छन्।
८६ औं मिनेटमा निर्णायक गोल गरेका हालान्डले जितपछि भने, ‘यो इतिहास हो, पत्याउनै गाह्रो भइरहेको छ। हामी २८ वर्षपछि विश्वकपमा छनोट भयौँ, समूह चरण पार गर्यौँ र अब नकआउटमा आइभोरी कोस्टलाई हराएर न्यु योर्कमा ब्राजिलसँग खेल्दैछौँ। यो अद्भुत छ।’
उनले अगाडि थपे, ‘अहिले हामी निकै खुसी छौँ। अब हुने खेलहरू हाम्रा लागि बोनस जस्तै हुन्। हामी ढुक्क भएर खेल्नेछौँ र हरेक क्षणको आनन्द लिनेछौँ।’
मिडफिल्डर प्याट्रिक बर्गले हालान्डको प्रशंसा गर्दै भने, ‘उनी पूरै खेल चुपचाप पर्खेर बस्न सक्छन्, तर जब मौका आउँछ, उनी सधैं सही समयमा सही ठाउँमा हुन्छन्। उनी विश्वकै शीर्ष स्ट्राइकर हुन् र उनी हाम्रो टोलीमा हुनु गर्वको कुरा हो।’
आइभोरी कोस्टको बारेमा उनले भने, ‘उनीहरूले हामीलाई निकै गाह्रो बनाएका थिए। उनीहरूसँग उत्कृष्ट खेलाडीहरू छन्। तर हामीले धेरै वर्षदेखि गरेको मिहिनेतको फल आज पाएका छौँ। यो यात्रा अझै जारी रहनेछ।’
नर्वेका प्रशिक्षक स्टेले सोल्बाकेनले खेल निकै प्रतिस्पर्धात्मक भएको बताए। उनले भने, ‘दुवै टोली उत्तिकै बलिया थिए। १-१ को बराबरीपछि हामीले खेलमा बलियो पुनरागमन गर्यौँ। आइभोरी कोस्टले अन्तिम समयमा गोल गर्ने केही अवसर पाए पनि हामीले रक्षापंक्ति सम्हाल्यौँ।’
उनले थपे, ‘नर्वेको इतिहासमा पहिलो पटक विश्वकपको नकआउट खेल जित्नु ठूलो उपलब्धि हो। अब हामी केही समय आराम गर्नेछौँ र ब्राजिलसँगको खेलका लागि तयारी सुरु गर्नेछौँ।’
