क्यानडाको भ्याकुभरमा वर्षाले रुझेको बिहीबार साँझ स्विट्जरल्याण्डले आफ्नो फुटबल इतिहासमा एउटा नयाँ र स्वर्णिम अध्याय लेखेको छ।
फिफा विश्वकप २०२६ अन्तर्गत अन्तिम ३२ को खेलमा अल्जेरियालाई २-० ले पराजित गर्दै स्विट्जरल्याण्डले ७२ वर्षपछि पहिलो पटक विश्वकपको नकआउट खेल जितेको हो।
यसअघि स्विट्जरल्याण्डले सन् १९५४ मा आफैँले आयोजना गरेको विश्वकपमा इटालीलाई हराएर नकआउट चरण पार गरेको थियो। त्यसयताका ७२ वर्षमा स्विट्जरल्याण्डले संगी, ओलम्पिक खेलकुद र विज्ञानमा धेरै सफलता पाए पनि विश्वकपको नकआउट खेल जित्न सकेको थिएन।
स्विट्जरल्याण्डका लागि ब्रिल एम्बोलो र ड्यान एनडोएले गोल गर्दै टोलीलाई सहज जीत दिलाए। यो जीतसँगै स्विट्जरल्याण्ड प्रतियोगिताको अन्तिम १६ मा प्रवेश गरेको छ।
खेलपछि फिफासँग कुरा गर्दै गोलकर्ता ड्यान एनडोएले भने, ‘यो जित हाम्रो लागि निकै महत्त्वपूर्ण थियो। हामीले देशको लागि इतिहासको एउटा नयाँ पाना लेखेका छौँ। यो हाम्रो मात्र होइन, पूरै देशको सपना थियो। हामी यो सपनालाई अझै अगाडि बढाउन चाहन्छौँ।’
डिफेन्डर म्यानुएल आकान्जीले पनि पहिलो पटक कुनै गोल नखाई खेल जितेकोमा खुशी व्यक्त गरे। उनले भने, ‘हामीले राम्रो रक्षापंक्ति प्रस्तुत गर्यौँ र सही समयमा गोल गर्यौँ। अल्जेरियाले राम्रो खेल्यो, तर हाम्रो अनुभवले काम गर्यो।’
स्विट्जरल्याण्डको टोली अब भ्याकुभरमै बस्नेछ र अन्तिम १६ को खेलमा कोलम्बिया वा घानामध्ये एकको सामना गर्नेछ। एनडोए भन्छन्, ‘हामी जोसुकै विपक्षीसँग भिड्न पनि तयार छौँ। हामी विश्वको सबैभन्दा ठूलो मञ्चमा हाम्रो खेलको स्तर देखाउन चाहन्छौँ।’
