सन् २०२२ को कतार विश्वकपमा जस्तै एन्जो फर्नान्डेज फेरि एकपटक अर्जेन्टिनाका लागि संकटमोचक बनेका छन्।
विश्वकप २०२६ को 'राउन्ड अफ १६' मा इजिप्टविरुद्ध ३-२ को रोमाञ्चक पुनरागमन जित दिलाउन उनले निर्णायक गोल गरे। प्रशिक्षक लियोनल स्कालोनीको टोलीलाई सबैभन्दा बढी खाँचो परेको बेला एन्जोले आफ्नो क्षमता देखाएका हुन्।
कतार विश्वकपमा 'सर्वोत्कृष्ट युवा खेलाडी' को अवार्ड जितेका एन्जोले चार वर्षअघि मेक्सिकोविरुद्ध पनि महत्त्वपूर्ण गोल गरेका थिए। तर यसपटकको विश्वकपमा भने उनले खासै प्रभाव जमाउन सकेका थिएनन्।
मंगलबार अमेरिकाको एटलान्टा स्टेडियममा भएको खेलमा त्यो खडेरी तोडियो। खेलपछि उत्साहका साथ उनले भने, ‘यो मेरो खेल जीवनकै सबैभन्दा महत्त्वपूर्ण गोल हो। मेक्सिकोविरुद्धको गोल मेरो लागि दोस्रो स्थानमा छ। कतार विश्वकपदेखि नै म यस्तै गोलको प्रतीक्षामा थिएँ। यस्तो क्षण अनुभव गर्न पाएकोमा म भगवानलाई धन्यवाद दिन्छु र आफूलाई भाग्यमानी ठान्छु।’
खेलको अन्तिम समय (इन्जुरी टाइमको तेस्रो मिनेट) मा लाउटारो मार्टिनेजको उत्कृष्ट क्रसलाई हेडमार्फत गोलमा परिणत गर्दै एन्जोले अर्जेन्टिनाका समर्थकहरूलाई खुसीले पागल बनाए।
आफ्नो भावना साट्दै उनले अगाडि थपे, ‘जब बल जालीमा छिर्यो, मैले प्यारापिटमा रहेका मेरा परिवार र स्टेडियममा भएका सबै समर्थकहरूलाई सम्झिएँ। मेरो मुटु गर्व र भावनाले भरिएको थियो। हामीलाई थाहा छ, सबै अर्जेन्टिनीहरूले हामीलाई साथ दिइरहनुभएको छ, जुन हाम्रा लागि निकै महत्त्वपूर्ण छ।’
स्कालोनी प्रशिक्षक बनेपछि अर्जेन्टिनाले विश्वकपमा दुई गोलले पछि परेको अवस्थाबाट पुनरागमन गरी खेल जितेको यो पहिलो पटक हो।
खेलको ७९ औं मिनेटसम्म इजिप्ट २-० ले अगाडि थियो र खेल उसको नियन्त्रणमा देखिन्थ्यो। तर ७९ औं मिनेटमा क्रिस्टियन रोमेरोले हेडमार्फत गोल गर्दै आशा जगाए। त्यसपछि ८३ औं मिनेटमा लियोनल मेसLले गोल गरेर खेल बराबरीमा ल्याए। अन्ततः एन्जोले विजयी गोल गरे, जुन गोल फिफा विश्वकप इतिहासकै ३,००० औं गोल समेत बन्यो।
आफ्ना सहकर्मीहरूको प्रशंसा गर्दै एन्जोले भने, ‘हाम्रो टोली कहिल्यै हार नमान्ने र उत्कृष्ट क्षमता भएको समूह हो। जस्तोसुकै कठिन परिस्थितिमा पनि हामी एकजुट हुन्छौँ।’
कतारको सफलता सम्झिँदै उनले थपे, ‘हामी यहाँ देशको प्रतिनिधित्व गर्न आएका हौँ र हाम्रो लक्ष्य फेरि विश्वकप जित्नु नै हो।’
अन्तमा उनले टिमका साथीहरू, प्रशिक्षक र विश्वभरिबाट समर्थन गर्ने सबै अर्जेन्टिनी समर्थकहरूलाई धन्यवाद दिँदै अबको ध्यान क्वार्टरफाइनलमा केन्द्रित रहेको बताए।
