फिफा विश्वकप २०२६ अन्तर्गत अन्तिम १६ को खेलमा अर्जेन्टिनासँग ३-२ को रोमाञ्चक तर विवादास्पद हार बेहोरेपछि इजिप्ट फुटबल संघले फिफासँग कडा विरोध जनाएको छ। इजिप्टले उक्त खेल खेलाउने रेफ्री टोलीलाई नै विश्वकपबाट हटाउन माग गरेको छ।
इजिप्टले एटलान्टामा भएको खेलमा रेफ्रीले ‘दोहोरो मापदण्ड’ अपनाएको आरोप लगाएको छ। उसका मुख्य दुईवटा आपत्ति छन्।
जसमा इजिप्ट १-० ले अगाडि भएको बेला मोस्ताफा जिकोले गरेको एउटा गोललाई भीएआरले रद्द गरिदियो। रेफ्रीले खेलको सुरुमा इजिप्टका खेलाडीले अर्जेन्टिनाका लिसेन्द्रो मार्टिनेजलाई फाउल गरेको ठहर गरेका थिए।
यस्तै खेलको अन्तिम समयमा मोहम्मद सलाहलाई अर्जेन्टिनाको पेनाल्टी क्षेत्रमा लडाइएको थियो। तर रेफ्रीले फाउल दिएनन्। त्यही मुभको लगत्तै अर्जेन्टिनाले काउन्टर अट्याक गर्दै ३-२ को विजयी गोल गर्यो।
इजिप्ट फुटबल संघका अध्यक्ष हानी अबु रिदाले फ्रान्सेली रेफ्री फ्रान्कोइस लेटेक्सियर र उनको टोलीविरुद्ध उजुरी दर्ता गरेका छन्। संघले यसलाई ‘इजिप्टको टोलीविरुद्ध गरिएको भेदभाव र अपराध’ भनेको छ। उनीहरूले रेफ्रीले केही भिडियो फुटेजहरू हेर्न नै अस्वीकार गरेको आरोप लगाएका छन्।
इजिप्टका प्रशिक्षक होसाम हसनले भने, ‘हामीमाथि ठूलो अन्याय भयो। सायद उनीहरू विश्वविजेता अर्जेन्टिना र मेस्सीलाई प्रतियोगितामा टिकाइराख्न चाहन्थे।" यस्तै, खेलाडी मोस्ताफा जिकोले झन् कडा शब्दमा टिप्पणी गर्दै भनेका छन्, ‘यो प्रतियोगिता नै 'फिक्स' (मिलेमतो) भएको स्पष्ट छ।’
खेल विज्ञहरूका अनुसार इजिप्टले उजुरी गरे पनि फिफाले खासै केही गर्ने सम्भावना देखिँदैन। सन् २०२२ को विश्वकपमा फ्रान्सले ट्युनिसियाविरुद्ध गरेको यस्तै उजुरीलाई पनि फिफाले कुनै ठोस कारण नदिई खारेज गरिदिएको थियो। फुटबलमा रेफ्रीका निर्णयहरू धेरैजसो स्वविवेकमा आधारित हुने भएकाले यस्ता उजुरीहरूले नतिजा बदल्ने सम्भावना शून्य जस्तै हुन्छ।
अब अर्जेन्टिनाले शनिबार कान्सास सिटीमा स्विट्जरल्याण्डसँग क्वार्टरफाइनल खेल्ने तय भइसकेको छ। इजिप्ट भने आफ्ना लागि यो विश्वकपमा अन्याय भएको महसुस गर्दै घर फर्किएको छ।
