विश्वकप फुटबल २०२६ का क्रममा अमेरिकी स्ट्राइकर फोलारिन बालगनमाथि लागेको एक खेलको प्रतिबन्ध फिफाले हटाएपछि ठूलो विवाद सिर्जना भएको छ।
यसै विषयलाई लिएर ७२ जना युरोपेली सांसदहरूले फिफा र यसका अध्यक्ष जियानी इन्फान्टिनोमाथि 'राजनीतिक तटस्थता' कायम राख्न नसकेको भन्दै छानबिनको माग गरेका छन्।
सन् २०२६ को विश्वकप अन्तर्गत अमेरिका र बोस्निया-हर्जगोभिनाबीचको खेलमा बालगनले 'रातो कार्ड' पाएका थिए। नियमअनुसार उनले बेल्जियमविरुद्धको अर्को महत्त्वपूर्ण खेल खेल्न नपाउनुपर्ने थियो। तर, फिफाको अनुशासन समितिले उनको प्रतिबन्ध रोक्का गरिदियो र उनले बेल्जियमविरुद्धको खेल खेल्न पाए (जसमा अमेरिका ४-१ ले पराजित भयो)।
विवाद त्यतिबेला झन् चर्कियो जब अमेरिकी राष्ट्रपति डोनाल्ड ट्रम्पले आफैंले फिफा अध्यक्ष इन्फान्टिनोलाई फोन गरेर बालगनको रातो कार्डलाई ‘ठूलो अन्याय’ भन्दै पुनरावलोकन गर्न आग्रह गरेको पुष्टि गरे। ट्रम्प र इन्फान्टिनोबीच लामो समयदेखि निकट सम्बन्ध रहेको मानिन्छ।
अध्यक्ष इन्फान्टिनोले आफ्नो बचाउ गर्दै भनेका छन्, फिफाका न्यायिक निकायहरू स्वतन्त्र छन्। मैले राष्ट्रपति ट्रम्पलाई यो एउटा कानुनी प्रक्रिया हो र यसको निर्णय सक्षम निकायले नै गर्नेछ भनेर स्पष्ट पारेको थिएँ।’
युरोपेली संसदका ७२ सदस्यहरूले युरोपका २७ वटा फुटबल संघलाई पत्र लेख्दै यस निर्णय प्रक्रियामाथि छानबिन गर्न आग्रह गरेका छन्। उनीहरूका अनुसार फिफाको आफ्नै नियमावली र आचारसंहिताले फुटबलमा राजनीतिक हस्तक्षेप निषेध गरेको छ।
यसअघि इन्फान्टिनोले राष्ट्रपति ट्रम्पलाई 'फिफा शान्ति पुरस्कार' दिएको विषयमा पनि ५० जना सांसदहरूले फिफाको नैतिकतामाथि प्रश्न उठाउँदै पत्र लेखिसकेका थिए।
युरोपेली फुटबल महासंघ (युइएफए) ले फिफाको यो निर्णय ‘बुझिनसक्नु’ रहेको र यसले ‘लक्ष्मण रेखा’ (पार गरेको भन्दै आलोचना गरेको छ।
युइएफएकी उपाध्यक्ष लाउरा म्याकलिस्टरले चेतावनी दिँदै भनिन्, ‘यदि कुनै पनि राजनीतिक नेताले फोन गरेर मैदानमा दिइएको सजाय परिवर्तन गर्न सक्ने हो भने, यो फुटबलका लागि निकै खतरनाक नजिर बन्नेछ।’
