फिफाका रेफ्री प्रमुख पियरलुइगी कोलिनाले फिफा विश्वकप २०२६ अन्तर्गत अर्जेन्टिना र इजिप्टबीच भएको अन्तिम १६ को खेलमा रेफ्रीले गरेका निर्णय पूर्वाग्रही नभएको स्पष्ट पारेका छन्।
फिफासँगको अन्तर्वार्तामा उनले यो खेलको विषयमा आफ्नो धारण सार्वजनिक गरेका हुन्।
उनका अनसार जब कुनै गोल हुन्छ, भिडियो असिस्टेन्ट रेफ्री (भार) ले गोल हुनुभन्दा ठीक अगाडिको आक्रमणको चरण चेक गर्छ।
यदि गोल हुनुअघि कतै 'फउल' भएको छ र त्यसले गोल गर्न मद्दत पुर्याएको छ भने गोल रद्द हुन सक्ने नियम उनले ब्याख्या गरे। उनका अनुसार फउलमा कुनै समय वा दूरीको कुनै निश्चित सीमा हुँदैन।
अर्जेन्टिना र इजिप्टको खेलमा इजिप्टका मरवान अतियाले अर्जेन्टिनाका लिसेन्द्रो मार्टिनेजको खुट्टामा कुल्चिएका थिए। रेफ्रीले नदेखे पनि भारले हस्तक्षेप गर्न सक्छ, किनकि खुट्टामा कुल्चिनु स्पष्ट फाउल भएको उनको भनाइ छ।
उनले भने, ‘जुनसुकै फउल पनि फउल भएको भन्ने हामी विश्वास गर्छौं। त्यो फउल हेर्दा स्पष्ट फउल देखिए पनि नदेखिए पनि (यदि रेफ्रीले मैदानमा नदेखे) भारले हस्तक्षेप गर्न सक्छ।’
सोही खेलको अन्त्यतिर मोहम्मद सलाह र जुलियन अल्भारेजबीचको सम्पर्कलाई 'सामान्य फुटबल कन्ट्याक्ट' भनेका छन्। यदि डिफेन्डरले पहिले बल छोएको छ र त्यसपछि सामान्य ‘कन्ट्याक्ट’ हुन्छ भने त्यसलाई फाउल नमानिने उनले बताए।
कोलिनाका अनुसार अहिलेसम्मको समग्र प्रदर्शनबाट उनी खुसी छन्। थोरै समयमा धेरै खेल हुँदा कहिलेकाहीँ सोचेजस्तो नहुनु सामान्य भएको तर रेफ्रीहरू अर्को खेलमा अझ राम्रो गर्न प्रतिबद्ध रहेको उनको भनाइ छ।
कोलिनाले रेफ्रीको इमानदारीमाथि शंका नगर्न चेतावनी दिएका छन्। उनले भनेका छन्, ‘निर्णयहरूमाथि स्वस्थ बहस हुनु राम्रो हो, तर आधारहीन आरोप लगाउनु गलत हो।’
यस्ता आरोपले रेफ्री र उनीहरूका परिवारको सुरक्षामा खतरा पुर्याउन सक्ने भन्दै उनले चिन्ता व्यक्त गरे।
उनले फिफाको रेफ्री टोली पूर्ण रूपमा स्वतन्त्र रहेको बताए। फिफा अध्यक्ष जियानी इन्फान्टिनोले समेत रेफ्रीको काममा कुनै हस्तक्षेप नगर्ने उनको जिकिर छ। अध्यक्ष इन्फान्टिनोले सधैँ रेफ्री टोलीलाई समर्थन गर्ने र स्वतन्त्रतामा विश्वास गर्ने गरेको कोलिनाले बताए।
