फिफा विश्वकप २०२६ अब अन्तिम चरणमा प्रवेश गरेको छ। ४८ टोलीबाट सुरु भएको यो प्रतियोगितामा अब केवल ८ टोली बाँकी छन्, जसको सपना जुलाई १९ मा अमेरिकाको न्यूजर्सीस्थित मेटलाइफ रंगशालामा सुनौलो ट्रफी उचाल्नु हो।
अब अन्तिम आठमा फ्रान्स-मोरक्को, स्पेन-बेल्जियम, इंग्ल्यान्ड-नर्वे र अर्जेन्टिना-स्विट्जरल्यान्ड भिड्नेछन्।
१. ब्राजिल र जर्मनीको अभाव
विश्व फुटबलको इतिहासमा पहिलोपटक क्वार्टरफाइनलको चरणमा ब्राजिल र जर्मनी दुवै टोली छैनन्। यी दुई महारथी टोली एकैसाथ अन्तिम आठमा नपुगेको यो विश्वकपमा क्वार्टरफाइनलमा चरण सुरु भएपछि पहिलो घटना हो।
२. पुरानै अनुहार र नयाँ दाबेदार
सन् २०२२ को विश्वकपमा क्वार्टरफाइनल पुगेका अर्जेन्टिना, इंग्ल्याण्ड, फ्रान्स र मोरक्को यसपटक पनि अन्तिम आठमा पर्न सफल भएका छन्। बाँकी चार टोली बेल्जियम, स्विट्जरल्याण्ड, नर्वे र स्पेन हुन्। अर्जेन्टिना, फ्रान्स, इंग्ल्याण्ड र स्पेनले पहिले नै उपाधि जितिसकेका छन् भने बाँकी चार टोली पहिलो पटक विश्वविजेता बन्ने दाउमा छन्।
३. नर्वेको ऐतिहासिक प्रदर्शन
स्टार स्ट्राइकर एर्लिङ हालान्डको प्रेरणामा रहेको नर्वे पहिलोपटक विश्वकपको क्वार्टरफाइनलमा पुगेको छ। उसले ब्राजिललाई हराएर यो सफलता हात पारेको हो। अर्कोतर्फ इंग्ल्याण्ड सबैभन्दा धेरै (१० पटक) क्वार्टरफाइनल पुग्ने टोली बनेको छ।
४. मोरक्कोको अर्को कीर्तिमान
गत विश्वकपमा सेमिफाइनल पुगेर इतिहास रचेको मोरक्को लगातार दुई पटक विश्वकपको क्वार्टरफाइनल पुग्ने पहिलो अफ्रिकी टोली बनेको छ।
५. टोलीहरूको प्रदर्शन र तथ्यांक
फ्रान्स: फ्रान्स मात्र एउटा यस्तो टोली हो जसले अहिलेसम्मका सबै ५ खेल अतिरिक्त समयमा नगई निर्धारित ९० मिनेटभित्रै जितेको छ।
स्पेन: स्पेनको उत्कृष्ट रक्षापंक्ति देखिएको छ। अहिलेसम्म खेलेका ५ खेलमा स्पेनले विपक्षीलाई एक गोल पनि गर्न दिएको छैन। सन् १९९० मा इटालीपछि यस्तो उपलब्धि हासिल गर्ने स्पेन पहिलो टोली हो।
सर्वाधिक गोल: फ्रान्स र अर्जेन्टिनाले समान १४–१४ गोल गरेका छन् भने बेल्जियमले १३ गोल गरेको छ।
६. गोल्डेन बुटको रोमाञ्चक दौड:
सर्वाधिक गोलकर्ता बन्ने दौड निकै रोचक मोडमा छ। यो दौडमा पाँच खेलाडीबीच रोचक भिडन्त देखिएको छ।
• लिओनल मेसी: ८ गोल
• केलियन एमबाप्पे: ७ गोल
• एर्लिङ हालान्ड: ७ गोल
• ह्यारी केन: ६ गोल
• ज्युड बेलिङघम,मिकेल ओयार्जाबाल र ओस्मान डेम्बेले पनि ४–४ गोलका साथ यो दौडमा छन्।
