फिफा विश्वकप २०२६ को क्वार्टरफाइनलमा मोरक्कोविरुद्ध २-० को जित निकाल्दै साविक उपविजेता फ्रान्स विश्वकपको सेमिफाइनलमा प्रवेश गरेको छ।
पहिलो हाफमा पेनाल्टी मिस गरे पनि कप्तान केलियन एमबाप्पेले ६०औँ मिनेटमा पेनाल्टी एरियाको ठीक भित्रबाट उत्कृष्ट 'कर्लिङ' प्रहार गर्दै फ्रान्सलाई १-० को अग्रता दिलाए। त्यसको ६ मिनेटपछि नै उस्मान डेम्बेलेले मोरक्कोको रक्षापंक्तिलाई छक्याउँदै दोस्रो गोल गरे।
अमेरिकाको बोस्टनमा भएको खेलमा खेलको ७७औँ मिनेटमा कप्तान केलियन एमबाप्पे मैदानबाट बाहिरिँदा उनका समर्थकहरूमाझ केही चिन्ता देखिएको थियो। बोस्टन रंगशालामा उपस्थित हजारौँ दर्शकले उभिएर ताली बजाउँदै (उनलाई बिदाइ गरेका थिए। उनको स्थानमा जीन-फिलिप माटेटा मैदान छिरेका थिए।
मैदानबाट बाहिरिँदा एमबाप्पेको दाहिने कुर्कुच्चामा बरफ लगाइएको देखिए पनि उनले आफू ठिक रहेको बताएका छन्। खेलपछि प्रतिक्रिया दिँदै एमबाप्पेले भने, ‘मेरो कुर्कुच्चामा सामान्य चोट लागेको छ, तर म पूर्ण रूपमा ठिक छु। खेलको अन्तिम मिनेटमा खेल्नका लागि मभन्दा माटेटा बढी फिट र राम्रो अवस्थामा थिए, त्यसैले म बाहिरिएको हुँ। त्यहाँ योभन्दा बढी केही भएको छैन।’
खेल सकिएपछि उनी साथीहरूसँग खुसीयाली मनाउँदै उफ्रिरहेको देख्दा चोट गम्भीर नभएको अनुमान गरिएको छ।
एमबाप्पेले यस प्रतियोगितामा अर्जेन्टिनाका लिओनल मेसीको ८ गोलको बराबरी गरेका छन्। तर, बढी 'असिस्ट' (गरेका कारण एमबाप्पे अहिले 'गोल्डेन बुट' को दौडमा अगाडि छन्।
विश्वकपको इतिहासमै सबैभन्दा धेरै गोल गर्ने कीर्तिमानका लागि पनि मेसी र एमबाप्पेबीच कडा प्रतिस्पर्धा देखिएको छ। ३९ वर्षीय मेस्सीको नाममा २१ गोल छ भने २७ वर्षीय एमबाप्पे २० गोलमा पुगिसकेका छन्।
