मेक्सिकोविरुद्धको खेलमा रातो कार्ड पाएका इंग्ल्याण्डका डिफेन्डर जरेल क्वान्सालाई दुई खेलको प्रतिबन्ध लगाइएको छ। ३-२ ले जितेको उक्त खेलको ५४ औँ मिनेटमा जिसस गालार्डोमाथि खतरनाक 'ट्याकल' गरेपछि क्वान्सा मैदानबाट बाहिरिएका थिए।
फिफाको अनुशासन समितिले यसलाई 'गम्भीर फाउल'को श्रेणीमा राख्दै स्वतः लाग्ने एक खेलको प्रतिबन्धमा थप एक खेल थपेको हो। हाल जर्मन क्लब बायर लेभरकुजेनबाट व्यावसायिक फुटबल खेलिरहेका पूर्व लिभरपुल खेलाडी क्वान्साले शनिबार नर्वे विरुद्ध हुने क्वाटरफाइनल र इंग्ल्याण्ड सेमिफाइनलमा पुगेमा अर्जेन्टिना वा स्विजरल्याण्ड विरुद्धको खेल पनि गुमाउनेछन्। २३ वर्षीय क्वान्सा जुलाई १९ मा न्यु जर्सीमा हुने फाइनल खेलका लागि मात्र उपलब्ध हुनेछन्।
इंग्ल्याण्डको फुटबल एसोसिएसनले यो प्रतिबन्धविरुद्ध पुनरावेदन दिनेबारे सोचेको थियो, तर प्रतियोगिताको नियम अनुसार यस्तो प्रतिबन्धमा चुनौती दिने ठाउँ छैन। यद्यपि, 'भीएआर'को प्रक्रियालाई लिएर एफएले फिफासमक्ष कडा आपत्ति जनाएको छ। रेफ्रीलाई निर्णय लिनुअघि सुरुमै भिडियोलाई स्थिर तस्बिर र 'स्लो-मोसन' देखाइएको थियो, जसले गर्दा रेफ्रीको निर्णयमा पूर्वाग्रह परेको एफएको तर्क छ।
प्रिमियर लिगमा भने पहिले खेलको वास्तविक गतिमा भिडियो देखाउने गरिन्छ। यो प्रतिबन्धले मुख्य प्रशिक्षक थोमस टुचेललाई 'राइट-ब्याक' स्थानका लागि टोली छनोट गर्न समस्या पारेको छ।
बालोगन र क्वान्साको सजायमा भेदभाव?
क्वान्सालाई दिइएको यो कडा सजायले अमेरिकी फरवार्ड फोलारिन बालोगनको घटनासँग तुलना गर्दा फिफाको दोहोरो मापदण्ड छताछुल्ल पारेको छ। बालोगनले पनि बोस्निया विरुद्धको खेलमा यस्तै गम्भीर फाउल गरेका थिए, तर फिफाले उनलाई एक खेलको मात्र प्रतिबन्ध लगाएर त्यो पनि १२ महिनाका लागि निलम्बन गरिदिएको थियो।
अमेरिकी राष्ट्रपति डोनाल्ड ट्रम्पले फिफा अध्यक्ष जियानी इन्फान्टिनोलाई फोन गरेर बालोगनको रातो कार्डबारे पुनरावलोकन गर्न आग्रह गरेको कुरा बाहिर आएको छ। फिफाले बालोगनको सन्दर्भमा 'विशेष परिस्थिति' भन्दै खुकुलो निर्णय लिएपछि धेरैले यसको आलोचना गरेका छन्।
क्वान्सा फाइनलअघि उपलब्ध नहुने भएपछि 'राइट-ब्याक' को समस्या फेरि बल्झिएको छ। टिनो लिभ्रामेन्टो टोली बाहिर छन् भने ट्रेन्ट अलेक्जेन्डर-आर्नोल्ड छनोटमै परेका छैनन्। रिस जेम्सको फिटनेस अझै शंकास्पद छ। क्वान्सा आफैँ पनि मेक्सिको विरुद्धको खेलमा घाइते भएका थिए।
अब प्रशिक्षक टुचेलले एज्री कोन्सा, ट्रेभो चालोबाह वा जेड स्पेन्समध्ये एकलाई सो स्थानमा प्रयोग गर्नुपर्ने हुन्छ। अर्लिङ हालान्ड जस्ता आक्रामक खेलाडी भएको नर्वे विरुद्ध रक्षापंक्ति मिलाउनु इंग्ल्याण्डका लागि ठूलो चुनौती हुने देखिन्छ।
