सन् २०२६ को फिफा विश्वकपमा फ्रान्सका दुई फरवार्ड केलियन एमबाप्पे र ओस्मान डेम्बेलेले मिलेर कुल १३ गोल गरेका छन्। एउटै टोलीका दुई खेलाडीले यति धेरै गोल गरेको यो उपलब्धि सन् २००२ मा ब्राजिलका रोनाल्डो र रिभाल्डोले बनाएयताकै पहिलो हो।
सोमबार भएको क्वाटरफाइनल खेलमा मोरक्कोलाई २-० ले पराजित गर्दै फ्रान्स सेमिफाइनलमा प्रवेश गरेको छ। खेलमा एमबाप्पेले पहिलो गोल गर्दै टोलीलाई अग्रता दिलाए भने डेम्बेलेले दोस्रो गोल गर्दै फ्रान्सको जित सुनिश्चित गरे। यस विश्वकपमा यो फ्रान्सेली जोडीले ऐतिहासिक प्रदर्शन गरिरहेको छ।
यस प्रतियोगितामा एमबाप्पेको यो आठौँ गोल हो भने विश्वकपका कुल २० खेलमा उनको यो २०औँ गोल हो। अर्कोतर्फ कप्तान एमबाप्पेको चलाखीपूर्ण मुभको फाइदा उठाउँदै डेम्बेलेले यस विश्वकपमा आफ्नो व्यक्तिगत पाँचौँ गोल पुरा गरे।
खेलपछि डेम्बेलेले भने, फ्रा’न्स र पेरिस सेन्ट-जर्मेन दुवै टोलीबाट खेल्दा म निकै सहज महसुस गर्छु। मैले पहिले पनि भनेको छु—यो प्रतियोगितामा म हरेक खेलसँगै झन् बलियो बन्दै गइरहेको छु।’
यी दुईको प्रदर्शनले फ्रान्सलाई एउटा विशेष उपलब्धिमा पुर्याएको छ। सन् २००२ को विश्वकपमा ब्राजिलका रोनाल्डो (८ गोल) र रिभाल्डो (५ गोल) पछि एउटै देशका दुई खेलाडीले एकै विश्वकपमा ५ वा सोभन्दा बढी गोल गरेको यो पहिलो पटक हो।
विश्वकपको इतिहासमा यस्ता प्रभावशाली जोडीहरू कमै भेटिन्छन्। सन् १९३८ मा हंगेरीका ग्योर्गी सारोसी र ग्युला जेन्गेलरले यस्तै प्रभाव छाडेका थिए। त्यसको १६ वर्षपछि १९५४ मा हंगेरीकै स्यान्डर कोक्सिस (११ गोल) र फेरेन्क पुस्कास (४ गोल) ले नयाँ उचाइ थपे। सन् १९५० मा ब्राजिलका एडेमिर र चेकोको जोडीले पनि १३ गोलको योगदान दिएका थिए।
ब्राजिलको फुटबल इतिहास यस्ता महान जोडीहरूले भरिएको छ। सन् १९५८ मा पेले र वावा देखि १९७० को विश्वविजेता टोलीका पेले र जर्जिनो सम्मले फुटबल जगतलाई मन्त्रमुग्ध पारेका थिए।
त्यस्तै, फ्रान्सका जस्ट फोन्टेन र रेमन्ड कोपा (१९५८), जर्मनीका हेल्मुट हलर र फ्रान्ज बेकेनबाउर (१९६६), पोल्याण्डका लाटो र जार्मच (१९७४), र अर्जेन्टिनाका डिएगो म्याराडोना र जर्ज भाल्डानो (१९८६) ले विश्वकपको इतिहासमा आफ्नो नाम स्वर्ण अक्षरले लेखेका छन्।
सन् २००२ को विश्वकपमा रोनाल्डो र रिभाल्डोले संयुक्त रूपमा १३ गोल गर्दै ब्राजिललाई विश्वविजेता बनाएका थिए। रोनाल्डोले ८ गोल गर्दै गोल्डेन बुट जितेका थिए भने रिभाल्डोले ५ गोल गरेका थिए।
फ्रान्सले पनि अहिले सन् २००२ को ब्राजिलको जस्तै सफलताको सपना देखिरहेको छ। एमबाप्पे र डेम्बेलेले रोनाल्डो र रिभाल्डोको १३ गोलको रेकर्ड बराबरी गरिसकेका छन्। अब फ्रान्सले कम्तीमा दुई खेल (सेमिफाइनल र फाइनल वा तेस्रो स्थानको लागि खेल) खेल्न बाँकी छ, जसले उनीहरूलाई नयाँ इतिहास रच्ने अवसर दिएको छ। सन् १९३० मा विश्वकप सुरु भएदेखि अहिलेसम्म कुनै पनि टोलीका दुई खेलाडीले एकै संस्करणमा ६–६ गोल गर्न सकेका छैनन्।
यो ऐतिहासिक उपलब्धि अहिले फ्रान्सको पहुँचमा देखिएको छ। यद्यपी डेम्बेलेका अनुसार टोलीले अझै धेरै सुधार गर्न बाँकी छ। उनले भने, ‘हामी गोल गर्ने अवसरमा अझै तिखो हुनुपर्छ र रक्षापङ्क्तिमा कम गल्ती गर्नुपर्छ। हामीले एउटा एकाइका रूपमा अझ राम्रो दबाब दिन सक्छौँ। प्रतियोगितामा जति अगाडि बढ्छौँ, हामी त्यति नै राम्रो हुँदै जानेछौँ।’
एमबाप्पेले पनि डेम्बेलेको कुरामा सहमति जनाउँदै व्यक्तिगत कीर्तिमान भन्दा टोलीको जित ठुलो भएको बताए। उनले भने, ‘फ्रान्सको लक्ष्य सधैँ जित नै हो र यही एकता नै हाम्रो टोलीको शक्ति हो। हामीसँग प्रतिभाको कमी छैन, तर सबैभन्दा महत्त्वपूर्ण कुरा हामी एकअर्काका लागि खेल्छौँ। हामी सबैको एउटै लक्ष्य छ—विश्वकप जित्नु।‘’
अब यी दुईको नजर पुराना केही रेकर्डहरूमा हुनेछ। सन् १९५४ मा कोक्सिस र पुस्कासले संयुक्त १५ गोल गरेका थिए भने १९५८ मा फ्रान्सकै जस्ट फोन्टेन र कोपाले १६ गोलको कीर्तिमान बनाएका थिए। अहिलेको लय हेर्दा यी ऐतिहासिक रेकर्डहरू तोडिने सम्भावना देखिन्छ।
