फिफा विश्वकप फुटबल २०२६ मा मिकेल मेरिनो एक पटक फेरि स्पेनका लागि 'हिरो' साबित भएका छन्। सब्सिच्युट खेलाडीको रूपमा मैदान छिरेका उनले ८८औँ मिनेटमा गोल गर्दै बेल्जियमलाई स्तब्ध पारे र स्पेनलाई विश्वकपको सेमिफाइनलमा पुर्याए।
यसअघि पोर्चुगलविरुद्धको 'राउन्ड अफ १६' खेलमा पनि ९१औँ मिनेटमा विजयी गोल गरेका आर्सनलका यी मिडफिल्डरले लस एन्जलसमा भएको रोमाञ्चक क्वाटरफाइनलमा पनि ढिलो गरी गोल गर्दै खेलको निर्णय गरे। उनी ड्यानी ओल्मोको स्थानमा मैदान छिरेको मात्र ११७ सेकेन्डभित्रै गोल गर्न सफल भएका थिए।
खेलको ३०औँ मिनेटमा फाबियन रुइजले गोल गर्दै स्पेनलाई सुरुवाती अग्रता दिलाएका थिए। तर, पहिलो हाफ सकिन चार मिनेट बाँकी रहँदा चार्ल्स डे केटेलेरेले हेडमार्फत गोल गर्दै बेल्जियमलाई बराबरीमा ल्याए। यस गोलसँगै सन् २०२६ को विश्वकपमा स्पेनको ६४९ मिनेट लामो 'क्लिन सिट' (गोल नखाएको रेकर्ड) पनि तोडियो।
खेल १-१ को बराबरीमा रहेको र अतिरिक्त समयतर्फ धकेलिने सम्भावना बढिरहेका बेला ७१औँ मिनेटमा बेल्जियमका मुख्य गोलकिपर थिबाउट कोर्टुवा चोटका कारण रुँदै मैदानबाट बाहिरिनु खेलको मुख्य मोड बन्यो।
उनको स्थानमा आएका वैकल्पिक गोलकिपर सेने लेमेन्सले पाउ कुबार्सीको २५ यार्ड टाढाको प्रहारलाई नियन्त्रणमा लिन सकेनन्। त्यही रिबाउन्ड बललाई मेरिनाले जाली चुमाउँदै स्पेनको जित सुनिश्चित गरे।
अब लुइस डे ला फुएन्टेको नेतृत्वमा रहेको युरोपेली च्याम्पियन स्पेनले आगामी मंगलबार (१४ जुलाई) डलासमा हुने सेमिफाइनलमा फ्रान्सको सामना गर्नेछ।
स्पेनले सन् २०१० मा विश्वकप जितेयता खासै राम्रो प्रदर्शन गर्न सकेको थिएन। २०१४ मा समूह चरणबाटै बाहिरिएको स्पेन २०१८ र २०२२ मा अन्तिम १६ बाटै बिदा भएको थियो। तर अब स्पेन फेरि एक पटक विश्वस्तरको बलियो टोली बनाएको छ। यद्यपि, उपाधिको मुख्य दाबेदार भने पनि स्पेनले यस प्रतियोगितामा अझै आफ्नो सर्वश्रेष्ठ प्रदर्शन देखाउन बाँकी छ।
अर्कोतर्फ, बेल्जियमका लागि यो हार निकै पीडादायी रह्यो। खेलअघि नै टोलीका मुख्य मिडफिल्डर अमाडु ओनाना र युरी टिलेमान्स चोटका कारण बाहिरिएका थिए। तैपनि बेल्जियमले स्पेनी टोलीलाई कडा चुनौती दिएको थियो।
बार्सिलोनाका युवा स्टार लमिन यमालले यस खेलमा केही राम्रो मुभहरू बनाए पनि उनले आफ्नो लय पूर्ण रूपमा समात्न सकेका छैनन्। आगामी सेमिफाइनलको अघिल्लो दिन १९ वर्ष पुग्न लागेका यमालबाट स्पेनले थप राम्रो प्रदर्शनको अपेक्षा गरेको छ।
