अर्जेन्टिनी स्टार लिओनल मेसी र युरोपेली रेफ्रीबीच फिफा विश्वकप २०२६ अन्तर्गतको खेलमा मैदानमा भनाभन भएको छ।
२०२६ विश्वकपको क्वार्टरफाइनलमा अर्जेन्टिना र स्विजरल्याण्डबीचको खेलमा मेसी र रेफ्रीबीच विवाद भएको स्पेनिस मिडिया मार्काले लेखेको छ।
खेलको पहिलो हाफमा पोर्चुगिज रेफ्री जोआओ पेड्रो पिन्हेरोले आफूलाई सम्बोधन गरेको शैली चित्त नबुझेपछि मेसी उनीसँग प्रतिवादमा उत्रिएका थिए।
अर्जेन्टिनी टोलीको कप्तान मेसीले आफ्नो अडान राख्ने र रेफ्रीलाई सम्मानजनक ढङ्गले कुरा गर्न माग गरे।
'सेट-पिस' (फ्री-किक) को समयमा रेफ्रीले बोलेको लवज र शैली मेसीलाई मन परेको थिएन।
यो घटना स्विजरल्याण्डले फ्री-किक प्रहार गर्नु केही समयअघि भएको हो।
मेसी अर्जेन्टिनाको डिफेन्स लाइनमा उभिएका थिए। त्यही बेला रेफ्री पिन्हेरोले उनलाई तोकिएको दुरीमा पछाडि हट्न निर्देशन दिएका थिए। तर, रेफ्रीको बोल्ने शैली र हातको इशाराले मेस्सीलाई चिढ्यायो।
उनले तुरुन्तै जवाफ दिए- ‘मसँग राम्ररी बोल।
तनाव त्यतिमै सकिएन। फ्रि-किक प्रहार गरिसकेपछि पनि टेलिभिजन क्यामेराहरूले यी दुईबीचको अर्को संवाद कैद गरे। मेसी फेरि रेफ्रीको नजिक गए र उनको ओठबाट यो स्पष्ट बुझिन्थ्यो कि उनले भनिरहेका थिए, ‘मसँग राम्ररी बोल। मलाई अनादर नगर। म तिमीसँग राम्ररी बोलिरहेको छु, त्यसैले तिमी पनि मसँग शिष्ट भएर बोल।'
आफ्नो कुरा दृढताका साथ राखे पनि मेसी निकै संयमित देखिन्थे। उनले आफ्ना दुवै हात पछाडि बाँधेका थिए र शान्त रहेरै आफ्नो असन्तुष्टि पोखेका थिए।
यो भनाभनका कारण मेसीले कुनै पनि अनुशासनको कारबाही (कार्ड) भोग्नु परेन। तर विश्वकपको सेमिफाइनल पुग्ने दबाबपूर्ण खेलमा यो घटना सबैभन्दा बढी चर्चाको विषय बन्यो।
पोर्चुगलको भिला नोभा डे फामालिकाओमा जन्मिएका ३८ वर्षीय जोआओ पेड्रो पिन्हेरो युरोपका उदीयमान रेफ्री मानिन्छन्। उनले सन् २०१५ मा पोर्चुगलको शीर्ष डिभिजनमा डेब्यू गरेका थिए भने त्यसको एक वर्षपछि नै फिफाको अन्तर्राष्ट्रिय रेफ्रीको मान्यता पाएका थिए।
युरोपेली फुटबलमा उनको छवि राम्रो छ। उनले च्याम्पियन्स लिग, युरोपा लिग र २०२५ को युइएफए सुपर कप जस्ता ठूला प्रतियोगिताहरू सफलतापूर्वक खेलाइसकेका छन्।
उनको यही अनुभवका कारण उनलाई २०२६ को विश्वकप सञ्चालन गर्ने टोलीमा छानिएको हो।
