फिफा विश्वकप २०२६ को सेमिफाइनलमा फ्रान्स र स्पेन भिड्दै गर्दा धेरै कारणले यो खेल बहुप्रतिक्षित बनेको छ। तीमध्ये सबैभन्दा मुख्य आकर्षण भनेको विश्वका दुई उत्कृष्ट प्रतिभा— केलियन एमबाप्पे र लामिन यामललाई फेरि एकपटक विपक्षी टोलीमा देख्नु हो।
विश्वकपमा यी दुईको यो पहिलो भेट भए तापनि समग्रमा भने यो उनीहरूको पहिलो भिडन्त होइन। स्पेनिस क्लबद्वय बार्सिलोनाका विंगर यामल र रियल मड्रिडका स्ट्राइकर एमबाप्पे एक-अर्काविरुद्ध मैदान उत्रिएका १० पुराना खेलको रोचक तथ्य छन्।
फ्रान्स विरुद्ध स्पेन: यामलको दबदबा
यी दुई खेलाडीले आफ्नो राष्ट्रिय टोलीका लागि एक-अर्काविरुद्ध दुईवटा खेल खेलेका छन् र ती दुवै सेमिफाइनल थिए।
यूरो २०२४ को सेमिफाइनलमा यामलकै उत्कृष्ट गोलको मद्दतले स्पेनले फ्रान्सलाई २-१ ले हराएको थियो। त्यसको एक वर्षपछि जर्मनीमै भएको युइएफए नेसन्स लिगको सेमिफाइनलमा पनि स्पेन नै विजयी भयो। ९ गोलको वर्षा भएको उक्त रोमान्चक खेलमा यामलले दुई गोल गरेका थिए भने एमबाप्पेले पनि गोल गरेका थिए।
स्पेनका प्रशिक्षक लुइस डे ला फुएन्टेले यामलको प्रशंसा गर्दै भनेका थिए, ‘म लामिनका लागि धेरै खुसी छु। उनले आज मैदानबाट एउटा कडा सन्देश दिएका छन्।’
पिएसजी विरुद्ध बार्सिलोना: एमबाप्पेको पल्ला भारी
एमबाप्पे र यामल पहिलो पटक १० अप्रिल २०२४ मा च्याम्पियन्स लिगको क्वार्टर-फाइनलमा भिडेका थिए। पेरिसमा भएको उक्त पहिलो लेगको खेलमा कसैले गोल नगरे तापनि बार्सिलोनाले अप्रत्याशित ३-२ को जित निकालेको थियो।
तर, दोस्रो लेगमा भने एमबाप्पे हाबी भए। उनको दुई गोलको मद्दतले पीएसजीले ४-१ को जित निकाल्दै सेमिफाइनलमा स्थान बनाएको थियो।
रियल मड्रिड विरुद्ध बार्सिलोना: यामलको राज
सन् २०२४ जुनमा एमबाप्पे रियल मड्रिड गएपछि यी दुई स्टार ६ पटक आमनेसामने भएका छन्। कप फुटबलका 'नकआउट' खेलहरूमा यामल र बार्सिलोना एमबाप्पेमाथि पूर्ण रूपमा हाबी देखिएका छन्।
जेद्दामा भएका दुईवटा स्पेनी सुपरकोपा फाइनलमा बार्सिलोनाले रियललाई ५-२ (२०२५) र ३-२ (२०२६) ले हराएको थियो। त्यस्तै, २०२५ को कोपा डेल रे फाइनलमा पनि एमबाप्पेले फ्रि-किक मार्फत गोल गरे तापनि उनको टोली ३-२ ले पराजित भएको थियो।
ला लिगामा पनि उनीहरू तीन पटक भिडेका छन्। आफ्नो पहिलो 'एल क्लासिको' मा ४-० को हार बेहोरेका एमबाप्पेका लागि अर्को भेट निकै तितो-मिठो रह्यो। उनले ह्याट्रिक गरे तापनि उनको टोली ४-३ ले पराजित भयो, जसमा यामलले पनि एक गोल गरेका थिए।
यी दुईबीचको पछिल्लो भेट अक्टोबर २०२५ मा भएको थियो। उक्त खेलमा एमबाप्पेले गोल मात्र गरेनन्, बरु बार्सिलोनाविरुद्ध रियल मड्रिडका तर्फबाट २-१ को जित निकाल्दै पहिलो पटक ला लिगामा यामललाई हराउन सफल भए।
एमबाप्पे विरुद्ध यामल: नयाँ अध्यायको प्रतीक्षा
अहिलेसम्म यी दुई प्रतिभा १० पटक भिडेका छन्, जसमा यामलको टोली ८ पटक विजयी भएको छ। यद्यपि, व्यक्तिगत गोलको मामलामा भने एमबाप्पे अगाडि छन्। उनले ९ गोल गरेका छन् भने यामलले ६ गोल।
२०२६ को विश्वकपमा ६ खेल खेल्दै यामल १८ वर्ष वा सोभन्दा कम उमेरमा विश्वकपका ५ भन्दा बढी खेल खेल्ने पहिलो खेलाडी बनेका छन्। तर, उनले अहिलेसम्म साउदी अरबविरुद्ध मात्र एक गोल गरेका छन्।
‘गोल नगर्दा मलाई कुनै तनाव छैन,’ बेल्जियमविरुद्धको क्वार्टर-फाइनल जितपछि यामलले भने, ‘मैले मात्र एक गोल गरेर पनि यूरो २०२४ जितेको थिएँ। यदि मैले विश्वकप पनि जितेँ भने, मैले गोल गरेँ कि गरिनँ भनेर सायद कसैले सोध्ने छैनन्।’
एमबाप्पेले २०१८ को विश्वकप खेल्दा उनी १९ वर्षका थिए। उनले ७ खेलमा ४ गोल गर्दै विश्वकप जितेका थिए र 'बेस्ट योङ प्लेयर' अवार्ड पनि पाएका थिए। अहिले एमबाप्पे आफ्नो हारको बदला लिने सोचमा हुनेछन् भने यामल एमबाप्पेले जस्तै आफ्नो पहिलो विश्वकपमै उपाधि चुम्ने दाउमा छन्।
