अमेरिकाको एटलान्टामा भएको एउटा अत्यन्तै तनावपूर्ण र आक्रामक सेमिफाइनलमा ६ मिनेट २४ सेकेन्डको अन्तरालमा दुई गोल गर्दै अर्जेन्टिनाले इंग्ल्यान्डलाई स्तब्ध पार्यो।
यससँगै आगामी आइतबार राति न्युजर्सीको मेटलाइफ स्टेडियममा हुने विश्वकप फाइनलमा अब लिओनल मेसीको कप्तानीमा अर्जेन्टिनाले स्पेनको सामना गर्नेछ।
खेलको ५५औँ मिनेटमा एन्थोनी गोर्डनले गोल गरेपछि इंग्ल्यान्ड सन् १९६६ पछि पहिलो पटक फाइनल पुग्ने सँघारमा देखिएको थियो।
तर, खेल सकिन ५ मिनेट बाँकी रहँदा एन्जो फर्नान्डेजले डि-बक्स बाहिरबाट एउटा सानदार गोल गर्दै खेल बराबरीमा ल्याए। त्यसपछि इन्जुरी समयको दोस्रो मिनेटमा लाउटारो मार्टिनेजले हेडमार्फत निर्णायक गोल गरे।
यी दुवै गोलमा मेसीले 'असिस्ट' उपलब्ध गराएका थिए।
यस प्रतियोगितामा अर्जेन्टिनाले ७५औँ मिनेटपछि मात्र ११ गोल गरिसकेको छ, जसले उनीहरूको अन्त्यसम्म लड्ने क्षमतालाई दर्शाउँछ।
२१ वर्षपछि आमनेसामने भएका यी दुई टोलीबीचको खेलमा फुटबल मात्र थिएन, ऐतिहासिक विवाद र 'फाकल्याण्ड युद्ध' को छायाँ पनि प्रस्ट देखिन्थ्यो। अर्जेन्टिनी समर्थकहरूले इंग्ल्यान्डको राष्ट्रिय गानका बेला गरेको हुटिङले खेलको तापक्रम सुरुवातमै बढाएको थियो। खेलको अन्त्यमा अर्जेन्टिनाका केही खेलाडीले मैदानमा फाकल्याण्ड टापूको ब्यानर समेत देखाएका थिए।
खेल यति आक्रामक थियो कि पहिलो ३० मिनेटमा १२ वटा फाउल भए तर गोलका लागि एउटा पनि प्रहार हुन सकेन। यो सन् १९६६ पछिको विश्वकप इतिहासमा एउटा रेकर्ड हो। इंग्ल्यान्डका इलियट एण्डरसन र अर्जेन्टिनाका लिसान्द्रो मार्टिनेजले पहिलो हाफमै पहेँलो कार्ड पाएका थिए।
इंग्ल्यान्डले १-० को अग्रता लिएपछि प्रशिक्षक थोमस टुचेलले टोलीलाई रक्षात्मक। यही नै इंग्ल्यान्डका लागि प्रत्युत्पादक बन्यो। अर्जेन्टिनाले लगातार आक्रमण बुनेपछि इंग्ल्यान्डको रक्षापंक्ति अन्ततः भत्कियो।
३९ वर्ष नाघेका मेसी खेलको अन्त्यतिर थकित देखिएका थिए। १८ वर्ष कान्छा इङ्लिस खेलाडी निको ओ'रेलीसँग बल खोस्न दौडिँदा उनी गलेका देखिन्थे। तर, जब टिमलाई उनको खाँचो पर्यो, उनले आफ्नो जादु देखाइहाले। उनले आफैँ गोल नगरे पनि आफ्ना दुई सटीक पासमार्फत खेलको नतिजा नै बदलिदिए।
अमेरिकी रेफ्री इस्माइल एल्फाथले यो कठिन र तनावपूर्ण खेललाई निकै कुशलतापूर्वक नियन्त्रणमा राखे। उनले खेलको सुरुमा तनाव बढ्न दिएनन् र पछि कार्डको सही प्रयोग गरे।
सन् १९९० र २०१८ का सेमिफाइनल जस्तै यसपटक पनि इंग्ल्यान्ड जितको निकै नजिक पुगेर निराश हुनुपर्यो।
