विश्वकपको सेमिफाइनलमा ८४औँ मिनेटसम्म अग्रता जोगाइरहेको इंग्ल्यान्ड अन्तिम क्षणमा दुई गोल खाँदै अर्जेन्टिनासँग २–१ ले पराजित भएपछि प्रशिक्षक थोमस टुचेलको रणनीति चर्को आलोचनामा परेको छ। इंग्ल्यान्डका पूर्वखेलाडी र विश्लेषकहरूले टोलीले अग्रता लिएपछि अत्यधिक रक्षात्मक खेल्नु नै हारको मुख्य कारण भएको बताएका छन्।
एटलान्टामा भएको खेलमा एन्थोनी गोर्डनले ५५औँ मिनेटमा गोल गर्दै इंग्ल्यान्डलाई अग्रता दिलाएका थिए। त्यसपछि भने इंग्ल्यान्डले खेल नियन्त्रणमा राख्नेभन्दा पनि रक्षामा ध्यान केन्द्रित गर्यो।
त्यसको फाइदा उठाउँदै अर्जेन्टिनाका एन्जो फर्नान्डेजले ८५औँ मिनेटमा बराबरी गोल गरे भने इन्ज्युरी समयको ९२औँ मिनेटमा लाउटारो मार्टिनेजले हेडमार्फत विजयी गोल गरे। दुवै गोलमा कप्तान लियोनल मेसीले असिस्ट गरेका थिए।
खेलको तथ्यांकअनुसार अग्रता लिएपछि दोस्रो गोल खानुअघि सम्म इंग्ल्यान्डको बल नियन्त्रण केवल १२ प्रतिशतमा सीमित थियो।
टुचेलले अग्रता लिएपछि आक्रमणलाई बलियो बनाउने सट्टा एजरि कोन्सा, ड्यान बर्न र निको ओ'राइलीजस्ता रक्षकलाई मैदानमा उतारे।
अग्रपंक्तिका मार्कस रासफोर्ड र आइभान टोनी भने इन्ज्युरी समयमै मैदान छिरे, जुन धेरै ढिलो भएको भनेर बिबिसी स्पोर्ट्सले लेखेको छ।
इंग्ल्यान्डका पूर्वकप्तान वायन रुनीले पनि बिबिसीसँगकै कुराकानीमा इंग्ल्याण्ड आफ्नो रणनीतका कारण पराजित भएको बताए।
'यसको सुरुआत प्रशिक्षकका निर्णयबाट भयो। टोली अत्यन्त निष्क्रिय बन्यो। विश्व विजेता टोलीविरुद्ध यस्तो रणनीतिले सफलता पाउन सकिँदैन,' उनले भनेका छन्।
अर्का पूर्वकप्तान एलन शियररले पनि अर्जेन्टिनाको गुणस्तरीय टोलीविरुद्ध लामो समय रक्षात्मक भएर खेल्न नसकिने बताएका छन्। टुचेलले आफ्ना सबै रणनीतिक विकल्प धेरै चाँडै प्रयोग गरेको र त्यसले उल्टो असर गरेको उनको भनाइ छ।
पूर्वस्ट्राइकर क्रिस सटनले टुचेलको रणनीतिलाई 'प्रशिक्षणसम्बन्धी ठूलो भूल' को संज्ञा दिए। उनले भने, 'इंग्ल्यान्डले अग्रता लिएपछि खेलको नियन्त्रण अर्जेन्टिनालाई सुम्पियो। यस्तो स्तरको टोलीविरुद्ध ३० मिनेट लगातार रक्षा गरेर जित्न सकिँदैन। यो पूर्ण रूपमा प्रशिक्षकको निर्णयको परिणाम हो।'
पूर्वगोलकिपर जो हार्टले नर्वे र मेक्सिको इंग्ल्यान्डविरुद्ध दबाबमा परे पनि अर्जेन्टिना एकपटक पनि नआत्तिएको बताए। अर्जेन्टिनाले मेसीलाई स्वतन्त्र रूपमा खेल्ने अवसर दिएको र त्यसपछि खेलको गति नै बदलिएको उनको भनाइ छ।
पूर्वडिफेन्डर मिका रिचर्ड्सले पनि इंग्ल्यान्डले पहिलो गोलपछि दोस्रो गोलको खोजी गर्नुपर्नेमा जोड दिए। 'उनीहरूको गुणस्तरको सम्मान गर्नुपर्छ, तर अत्यधिक पछि हट्दा अर्जेन्टिनाले आफ्नो लय समात्ने अवसर पायो,' उनले भने।
पूर्वगोलकिपर पल रोबिन्सनले पनि टुचेलले धेरै चाँडै टोलीलाई रक्षात्मक बनाएको भन्दै त्यो निर्णय गलत भएको बिबिसी स्पोर्ट्ससँग बताएका छन्।
अर्जेन्टिनाका गोलकिपर एमिलियानो मार्टिनेजले समेत इंग्ल्यान्डले अग्रता लिएपछि खेलको गति परिवर्तन गरेको स्वीकार गरे। उनले भने, 'जितिरहँदा पनि अगाडि खेलिरहनुपर्छ। खेल योजना परिवर्तन गर्नु हुँदैन। तर उनीहरूले अतिरिक्त रक्षक उतारे।'
आलोचनाबीच पनि टुचेलले आफ्नो निर्णयको बचाउ गरेका छन्। खेलपछि उनले भने, 'मलाई कुनै पछुतो छैन। हारेपछि आलोचना हुनु स्वाभाविक हो। टोलीले सबैथोक दियो र हामी फाइनल पुग्न निकै नजिक थियौं। परिस्थितिअनुसार यो हाम्रो उत्कृष्ट प्रदर्शनमध्ये एक थियो। अहिले पूरै प्रतियोगिताको विश्लेषण गर्ने समय होइन।'
