फिफा विश्वकप २०२६ समापन आइतबार राति न्यू जर्सीको मेटलाइफ स्टेडियममा स्पेन र अर्जेन्टिनाबीचको 'ब्लकबस्टर' फाइनलसँगै हुँदैछ।
दुवै टोलीले उत्कृष्ट खेल र कडा प्रतिस्पर्धात्मक भावना देखाउँदै फाइनलको यात्रा तय गरेका हुन्। यस रोमाञ्चक खेलमा निर्णायक साबित हुन सक्ने तीन प्रमुख व्यक्तिगत टक्करको बारे फिफाले चर्चा गरेको छ।
१. लापोर्टे भर्सेस लिओनल मेसी
अर्जेन्टिनाका कप्तान लिओनल मेसीले भर्खरै ३९ वर्षको जन्मदिन मनाए। तर पनि उनको खेल जिताउने जादुमयी क्षमता अझै कम भएको छैन।
जारी विश्वकपमा उनी ८ गोलसहित 'गोल्डेन बुट' को दौडमा सबैभन्दा अगाडि छन् र विश्वकप इतिहासकै सर्वाधिक गोलकर्ता समेत बनेका छन्। उनले यस प्रतियोगितामा ४ वटा 'असिस्ट' पनि गरिसकेका छन्।
यदि स्पेनले मेसीलाई रोक्न सक्यो भने उसको दोस्रो पटक विश्वकप जित्ने सम्भावना बलियो हुनेछ। यो चुनौतीपूर्ण कामको जिम्मेवारी स्पेनका डिफेन्डर लापोर्टेको काँधमा हुनेछ।
लपोर्टे र १९ वर्षीय कुबार्सीको जोडीले यस विश्वकपका ७ खेलमा मात्र १ गोल खाएको छ। लापोर्टेको शान्त र परिपक्व खेलले मेसीलाई रोक्न महत्वपूर्ण हुनेछ।
२. रोड्री भर्सेस एन्जो फर्नान्डेज
यो खेल मिडफिल्डमा दुई हस्तीहरूबीच कडा टक्कर हुनेछ। स्पेनका कप्तान रोड्री यस विश्वकपमा निकै हावी देखिएका छन्। उनले प्रतियोगितामा सबैभन्दा धेरै ६४८ पासहरू खेलेका छन्, जसमा ९३ प्रतिशत सटिकता छ। उनले मैदानमा ८३,८०२ मिटर दूरी दौडेर आफ्नो शारीरिक क्षमताको पनि प्रमाण दिएका छन्।
रोड्रीलाई टक्कर दिन अर्जेन्टिनाका एन्जो फर्नान्डेज तयार छन्। २५ वर्षीय एन्जोले विपक्षीबाट बल खोस्ने र टिमलाई दबाबबाट मुक्त राख्न उत्कृष्ट भूमिका खेलेका छन्।
उनले नकआउट चरणमा इजिप्ट र इंग्ल्यान्ड महत्वपूर्ण गोल गर्दै अर्जेन्टिनाको फाइनल यात्रा सुरक्षित गरेका थिए। यी दुईबीचको भिडन्तले खेलको गति कुन टोलीको पक्षमा जान्छ भन्ने तय गर्नेछ।
३. लामिन यमाल भर्सेस निकोलस टाग्लियाफिको
यो भिडन्त युवा जोश र अनुभवबीचको हुनेछ। स्पेनका युवा स्टार ल्यामिन यमाल यस पुस्ताका सबैभन्दा प्रतिभाशाली खेलाडी मानिन्छन्। चोटपछि मैदान फर्किएका यमालको गति र चलाखीपूर्ण खेल फ्रान्सविरुद्धको सेमिफाइनलमा प्रष्ट देखिएको थियो।
उनलाई रोक्ने जिम्मेवारी अर्जेन्टिनाका अनुभवी लेफ्ट-ब्याक टाग्लियाफिकोको हुनेछ। ३३ वर्षीय टाग्लियाफिको सन् २०२२ को विश्वकप विजेता टोलीका सदस्य हुन्।
उनी 'वान-अन-वान' डिफेन्समा निकै माहिर छन्। उनको अनुभव र रणनीतिक बुझाइ यमाल जस्ता फुर्तिला खेलाडीलाई रोक्न अर्जेन्टिनाका लागि ठूलो हतियार हुनेछ।
