गुड फ्राइडे सिनेमा
हिमाञ्चल प्रदेशकी जीनतका श्रीमान अमर बिहेलगत्तै साउदी अरब जान्छन्।
साउदीमा अमरमाथि आफ्नो कोठामा बस्ने साथी शंकरलाई मारेको आरोपमा फाँसीको सजाय सुनाइन्छ। दुई महिनापछि फाँसीमा चढाउने तय भइसकेको अमरलाई बचाउने जीनतसँग आशाको त्यान्द्रो मात्रै बाँकी हुन्छ। त्यो हो, माफीनामामा मृतककी पत्नी मीराको हस्ताक्षर।
हत्याराकी श्रीमतीले मृतकको पत्नीसँग आफ्नो श्रीमानलाई जीवनदान दिन आग्रह गर्नुपर्ने परिस्थिति!
यो कस्तो जटिल अवस्था, कत्रो विडम्बना!
'डोर' यस्तै विडम्बनाको कथा हो।
सन् २००६ मा रिलिज डोरलाई बलिउडको सिनेमा बनाउने परम्परागत सूत्रमा पूरै कैद नभई, घेरा तोडेर त्यसलाई नयाँ उचाइमा पुर्याउने सिनेमाका रूपमा लिइन्छ।
फिल्ममा आयशा टाकिया मृतककी पत्नी मीरा र गुल पनाग जीनतको भूमिकामा छन्।
यी दुई पात्रबीच दुरी हुँदाहुँदै पनि अमूर्त सम्बन्ध छ। दुईमध्ये जीनत बलियो र स्थिर पात्र हुन्। मीरा परिवर्तनशील पात्र।
डोरका दुवै मुख्य पात्र फरक सांस्कृतिक परिवेश र मूल्य मान्यतामा हुर्केका महिला हुन्।
मुस्लिम समुदायकी जीनत आफ्नो जीवनको निर्णय आफै लिने स्वतन्त्र पात्र हुन्। राजस्थानकी मीरा सम्झौता गर्न अभ्यस्त गुम्सिएकी पात्र।
यी दुई परस्पर विपरीत स्वभावका पात्रलाई एकै ठाउँ उभ्याएर निर्देशकले चलाखीपूर्वक महिलाको दुःख र संघर्षका पाटा उधिनेका छन्।
हेर्नुहोस् युट्यबुमा
