गुड फ्राइडे सिनेमा
एउटा यस्तो गाउँ, जहाँ महिलाले अनुहार देखाउनु अपराध मानिन्छ। महिलाले घरबाहिर निस्किँदा अनुहार छोप्नुपर्छ। परिवारका सदस्यबाहेक अरू पुरूषले उनीहरूको अनुहार देख्न पाउँदैनन्।
यस्तो नियम तोड्ने महिलालाई देवीको श्राप लाग्ने र बलि दिनुपर्ने अन्धविश्वास छ।
सुभ्बु अर्थात् सुभलक्ष्मी यही परम्परामा हुर्किएकी युवती हुन्। उनी गाउँको नियम पालना गर्छिन्। स्थानीय युवक राजेशसँग उनको बिहेको तयारी भइरहेको हुन्छ।
एक दिन हावाले उनको घुम्टो उडाउँछ। त्यही बेला कसैले उनको तस्बिर खिच्छ।
पछि उनको अनुहार एउटा चर्चित पत्रिकाको आवरणमा छापिन्छ। गाउँलेले यो कुरा थाहा पाएपछि उनको बिहे रोकिन्छ। परम्परा तोडेको भन्दै उनीमाथि आत्महत्या गर्नुपर्ने दबाबसमेत दिइन्छ।
तर सुभ्बु बाँच्न सफल हुन्छिन्। त्यसपछि आफू निर्दोष भएको प्रमाणित गर्न उनी गाउँ छाडेर हिमालय क्षेत्रको धर्मशालातर्फ यात्रा गर्छिन्।
उनको यो यात्रामा साथ दिन्छिन् काकी रत्नम्मा र अमिष्टा अर्थात् अमीले। सहरमा काम गर्ने अमी शिक्षित र आत्मनिर्भर महिला हुन्। तर, उनले पनि आफ्नो कार्यस्थलमा लैंगिक विभेद भोगिरहेकी हुन्छिन्। रत्नम्माको जीवन भने घरपरिवारको जिम्मेवारीमै बितिरहेको हुन्छ।
तीन महिलाको यो यात्राले उनीहरूलाई एकअर्काको जीवन र संघर्ष बुझ्ने मौका दिन्छ। गाउँको घुम्टोभित्र बाँचेकी सुभ्बुले बाहिरी संसार देख्छिन्।
अमी र रत्नम्माले पनि आफ्नै जीवनका सीमा र बाध्यताबारे सोच्न थाल्छन्।
सुभ्बुको अनुहार खिच्ने फोटोग्राफर को हुन्? उनले खिचेको तस्बिर कसरी पत्रिकाको आवरणसम्म पुग्यो? सुभ्बुल धर्मशाला पुग्नुपर्ने कारण के हो? उनीहरूको यात्रा कहाँ पुगेर टुंगिन्छ?
यी सबै प्रश्नको जबाफ र सुभ्बुको जीवनमा आउने उतारचढाव जान्न हेर्नुस् तेलुगू फिल्म 'परदा'।
हेर्नुस् हिन्दी डब संस्करण युट्युबमा